Estrutura Polísia Sientifika Investigasaun Kriminál (PCIC), hala’o hela konferénsia imprensa iha edifísiu Caicoli, segunda (13/09/21). Imajen Tatoli/Nelson de Sousa.

DILI, 13 setembru 2021 (TATOLI)—Hahú hosi janeiru to’o agostu tinan ne’e, Polísia Sientifika Investigasaun Kriminál (PCIC sígla portugés), finaliza investigasaun ba kazu hamutuk 93, hodi remete ba Ministériu  Públiku (MP), no instala ona baze de dadus The International Criminal Police Organization (Interpol) iha Aeroportu.

Adjuntu Diretór Nasionál PCIC, Adino Nunes Cabral, hateten durante fulan ualu ne’e simu delegasaun kompeténsia hosi Ministéiru Públiku (MP), hodi halo Investigasaun ba kazu 93 no iha tan prosesu pendente hosi tinan 2020 hamutuk kazu 50.

Notísia relevante:PCIC rekolla vestíjiu biolóziku ba kazu soe bebé iha Manleuana

“Investigasaun kriminál finaliza ona, relatóriu finál no remete ba MP hamutuk 93 prosesu. Dadaun iha prosesu pendente hamutuk 41 ne’ebé ninia prosesu investigasaun kontinua la’o hela,” Adino Nunes Cabral, hateten ba jornalista-sira liu hosi konferénsia imprensa iha edifísiu PCIC, Caicoli, segunda ne’e.

Krime ne’ebé rejista aas liu maka falsifikasaun agravada no falsifikasaun dokumentu públiku, burla, omesídiu, violasaun seksuál, fraúde fiskál, esplorasaun ilísitu, jogu ho brankamentu kapitál.

Daudaun  ne’e, investiga mós krime ida ligadu ho kontra baze umanidade akontese iha tinan 1999, ne’ebé sei iha hela segredu justisa.

Alende simu delegasaun kompeténsia hosi MP no orientasaun Tribunál, PCIC halo ezame relasiona ho dijitál forénsika, hodi halo ba telemóvel, komputadór-sira atu deskobre prova ne’ebé guarda hela iha laran, nune’e ajuda autoridade judisiál iha faze inkéritu no julgamentu.

Durante janeiru to’o agostu, PCIC mós simu mandadu detensaun 24 hosi Tribunál ho mandadu buska no aprensaun hamutuk 15 prosesu no mandadu judisiáriu hirak ne’e PCIC konsege ezekuta hotu.

Alende janeiru-agostu, PCIC simu keixa eskrita diretamente hosi komunidade no entidade Estadu,  konsege emite númeru úniku kriminál (NUC) hamutuk  302, hanesan krime, nune’e remete ba Ministériu Públiku ka parte relevante hodi hala’o prosesu investigasaun.

Instala sistema baze de dadus Interpol iha Aeroportu

PCIC mós durante ne’e instala ona sistema baze dadus Interpol iha aeroportu internasionál Nicolau Lobato, Dili.

PCIC estabelese akordu ho Diresaun Nasionál Serbisu Imigrasaun halo espansaun baze dadus  ne’e  ho sistema Mine mobile interpol data base, fine fixed Interpol data base  (Mine and fine) ho objetivu atu halo kontrolu ba ema estranjeiru-sira ne’ebé tama mai Timor-Leste.

Kontrolu ne’e halo, liu-liu ba ema estranjeiru ne’ebé iha indikasaun  komete krime ruma ne’ebé tama ona ba baze de dadus Interpol  nian, bainhira tama mai iha aeroportu sistema bele deteta kedan,

“Bainhira deteta, prevene kedan labele tama hodi haruka fila ho intensaun atu labele akontese atividade kriminál ruma hanesan brankamentu kapitál ho finansiamentu terrorizmu ruma ne’ebé karik bele akontese iha TL, tanba ne’e sistema funsionamentu serbisu ne’e kontinua la’o hela,” Adino Nunes Cabral  hateten.

Iha tinan hirak liu ba sistema deteta sidadaun balun hosi Filipina ho Tailándia no konsege deporta fila.

Liu hosi kanál Interpól mós halo prepare notice ho modus opranding atividade kriminál ne’ebé akontese iha nasaun membru interpol sira, serbisu hamutuk hodi partilla ba malu entidade Estadu hanesan Imigrasaun, Alfândega no PNTL.

PCIC distribui ba instituisaun sira ne’e kona-ba atividade modus opranding ne’ebé hala’o, ligadu tráfiku ema ho atividade kriminál-sira seluk hodi bele kompreende.

Intervensaun Interpol ninian iha investigasaun, ajuda barak liu TL bainhira iha ema estranjeiru ne’ebé komete krime iha rai laran no fila ona ba nia rain ho kanál ne’e atu bele hatene antesedénsia kriminál ho paradeiru.

Kooperasaun serbisu Interpol seluk mós bainhira Governu presiza hatene serbisu relativamente ho kompañia internasionál balun hakarak investe iha rai laran, dalabarak liu hosi pedidu atu hatene kompañia ninia atividade bele husu ba nasaun orijen, hodi hatene énsia kriminál hodi prevene atividade krime iha rai laran.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here