Administradór Munisípiu Manufahi, Arantes Isaac Sarmento. Imajen/Egas Cristovão

DILI, 13 setembru 2021 (TATOLI)-Administradór Munisípiu Manufahi, Arantes Isaac Sarmento, hateten liuhosi reuniaun no aprezenta proposta ba Komité Revizaun Orsamentu Polítiku (KROP) kona-ba tetu Orsamentu Jerál Estadu (OJE) 2022, Manufahi husu adisionál millaun $3,894,670.

“Ministériu Finansa prevee tetu tinan fiskál 2022 ba Munisípiu Manufahi hamutuk millaun $3,2 ka $3,277,949, entaun ita haree alokasaun ne’e la sufisiente ba atividade ne’ebé ita planeia atu implementa iha tinan oin, entaun ita halo tan proposta adisionál hamutuk millaun $3,8 ka $3,894,670 atu finansia ba atividade ne’ebé ita planeia ona,” Arantes Isaac Sarmento, ba Agência Tatoli liuhosi telefónika, segunda ne’e.

Nia hatutan, orsamentu iha proposta adisionál ne’ebé munisípiu husu ne’e ba planu prioridade sira hanesan haree ba edukasaun, saúde, agrikultura estrada ponte, bee no saneamentu, turizmu, inkluzaun sosiál, servisu notariadu, boa governasaun no jestaun institusionál nian.

“Ita espera katak orsamentu sira ne’e bele aprova nune’e bele finansia ba planu ne’ebé ita halo ona,” nia hateten.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here