Imajen/Espesiál

DILI, 13 setembru 2021 (TATOLI)-Kongregasaun Jezuita Timor-Leste  lakon nia bibi-atan di’ak ida, Padre  Violento da Costa Soares Js.

Amu Violanto, iis-kotu  iha Klínika Maternidade Fatumeta, Dili tanba sofre  atakasaun derrepente iha meza leten bainhira han dadeer nian (matabixu) hamutuk hela ho kandidatu Jezuita sira seluk  iha Casa Gonzaga Bairru-Pité, Dili.

Superiór Jezuita iha Timor-Leste, Padre Joaquim Sarmento Js, fó sasin katak durante ne’e matebian laiha moras, maibé loron hirak ikus ne’e matebian sente isin lolon mak moras.

“Hafoin misa Amu Violanto da Costa Soares, sei hamutuk ho kandidatu Jezuita sira han dadeer ka matabixu hamutuk, no durante matabixu nia-laran mak akontese atakasaun matebian dezmaia, entaun Klínika Maternidade Fatumeta mak besik, kandidatu Jezuita sira lori lalais matebian ba klínika refere, iha ne’ebá Doutór sira koko atu reanima nia, maibé la konsege salva vida to’o iis-kotu iha oras tuku 07 liu minutu balu, dadersán ne’e,”  Amu Joaquim Sarmento Js, haktuir ba jornalista iha rezidénsia Jezuita iha Taibesi, Dili.

Amu Violanto da Costa Soares durante nia vida tomak nu’udar amu ida ne’ebé badinas iha nia knaar sira hotu tanba matebian ema ne’ebé hadomi loos nia vokasaun.

Santarina Xavier Rosário, nu’udar familia hosi Amu Violanto hateten, matebian nu’udar oan ida ne’ebé matenek no badinas dezde uluk. Bainhira sei ki’ik matebian mehi hakarak sai Amu-lulik, no mehi ne’e realiza duni.

“Nu’udar família sente triste no lakon boot, maibé ida ne’e Maromak nia planu ne’ebé buat hotu entrega ba Maromak,” Santarina Xavier Rosário  tenik.

Iha domingu (12/09), Amu Violanto sei vizita Santarina ho família iha uma Bidau. Sira han hamutuk no nia fó hatene ba ba Santarina katak nia moras estómagu.

“Ha’u dehan ba nia Amu koko ba konsulta took, maibé matebian hatán no haruka ha’u atu daan du’ut morin no ai-lia fó ba nia hemu. Maibé, ohin dadersán derrepente de’it simu novidade katak nia atakasaun dezmaia no fila ona ba Maromak,” Santarina hateten.

Matebian moris iha Dili, loron 04 outubru 1964, oan hosi Francisco da Silva (matebian) ho Esperança do Rosário (matebian).

Amu Violanto da Costa Soares iha maun alin na’in-hitu; feto tolu no mane haat. Amu Violento da Costa Soares nu’udar oan da-lima hosi maun alin na’in-hitu ne’e.

Matebian hahú tama eskola amu nian iha tinan loron 07 jullu 1987 no simu knaar nu’udár Amu-Lulik nian hahú iha tinan 2001, durante matebian simu knaar Amu-Lulik nian hahú fulan agostu 2001-2003 hala’o misaun hanesan, Ministru komunidade Jezuita iha rezidénsia Taibesi, hanesan Diretór ba programa kandidatu, sai Kapelaun prizaun no Ospitál Nasionál Guido Valadares.

Hosi tinan 2005-2007 matebian hanesan, Diretór Ministériu ba Juventude no família Dioseze Dili. Hosi 2008-2012 sai nu’udar Apostuladu Sosiál iha Munisípiu Covalima, no fevereiru-jullu 2011 Sabatiku iha Austrália.

Iha tinan 2012, fulan maiu to’o fulan jullu 2013 matebian sai hanesan, kuidadu ambientál iha Montserrat, Kasait-Ulmera, no Dioseze Maliana, no mós hanorin Teolojia Pastorál Fundamental iha Institutu Superiór Filozofia no Teolojia Dom Jaime Garcia Goulart, Fatumeta, Dili.

Amu Violanto mós sai Asistente Espirituál ba Irmãs Conceptionistas iha Tibar maiu 2012 to’o juñu 2015.

Jullu 2013 to’o agora matebian sai hanesan Diretór Nasionál Apóstolu Orasaun Kruzada Eukarístika Juventude, hanorin doutrina sosiál igreja katólika iha Institutu Superiór Filozofia no Teolojia Dom Jaime Garcia Goulart, Fatumeta, Dili no sai Diretór Espirituál iha Semináriu Maiór Inter-Diosezanu São Pedro São Paulo Fatumeta, Dili.

Iha loron 19 novembru 2015, matebian sai membru konsulta Comanhia de Jesus iha Timor-Leste, nune’e abríl 2016 to’o agora Konsellu Presbilateral Dioseze Dili nian, no maiu 2016 hanorin “A Vida de Oração” iha Semináriu Propedeutico João Maria Vianey, Maloa Dili.

Juñu 2016 hanesan Diretór ba Movimentu Emlesial no Grupu Categorial dira Dioseze Dili, no setembru 2016 to’o agora sai Asistente ba formasaun (hanorin Mariolójia) ba Noviça Kanossiana sira iha Becora, Dili.

Mate isin  Amu Violanto da Costa, ohin kalan, tau iha Igreja Balide, Dili sarani-sira, inklui seminarista, kongregasaun madre, padre sira troka malu reza no akompaña misa to’o aban (14/09) tuku 3:00 lorolaik, sei halo misa funerál nian, no tuir planu mate isin  sei haloot iha rezidénsia Jezuita, Taibesi, Dili.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here