Komunidade iha Suku Raiheu, postu administrativu Cailaco, Munisípiu Bobonaro, voluntariamente loke estrada foun kilómetru ha’at-resin, segunda (13/09/21). Imajen Facebook.

BOBONARO, 13 setembru 2021 (TATOLI)—Komunidade iha Suku Raiheu, postu administrativu Cailaco, Munisípiu Bobonaro, voluntariamente loke estrada foun kilómetru ha’at-resin, hodi fasilita movimentu.

Inisiativa hodi loke dalan foun ne’e mai hosi komunidade tanba desde tempu okupasaun Indonézia to’o to’o agora komunidade Raiheu seidauk asesu estrada.

Notísia relevante:Uma-ka’in 6.196 iha Bobonaro seidauk asesu eletrisidade

“Komunidade hadi’a de’it dalan tuan, maibé tempu udan atu ke’e fali mós la di’ak, tanba  ne’e deside koordena ho ha’u hodi loke fali estrada foun kuaze kilómetru ha’at-resin,” Xefe Suku Raiheu, Ventura Maria Tai, informa ba jornalista, iha Maliana, segunda ne’e.

Dalan foun ne’ebé komunidade loke hosi bairru Atu-Mucu  to’o aldeia Oho-Anan, inklui komunidade suku Atudara balun mós bele asesu tanba distánsia besik-malu.

Prosesu loke estrada foun ne’e durante fulan tolu, utiliza materiál tradiosionál hanesan, ai-suak, ensada, sekop, hodi ke’e rai no baku fatuk atu ateru estrada, no dalan ne’e konsege  benefisia povu agrikultór halo movimentu ba natar no toos liuliu ba atividade ekonómika.

Autoridade lokál ne’e, husu intervensaun hosi Governu, tanba laiha dranizen ne’ebé bele salva volume bee ne’ebé boot iha tempu udan, no posibilidade bele sobu hikas dalan ne’e.

Suku ne’e poténsia ba produsaun agríkola tanba maioria komunidade kuda hare, batar, liis, ai-farina, koto no produtu sira seluk ho kuantidade boot kada tinan.

Komunidade Raiheu, Marçal Soares, hateten, tinan-tinan sempre organiza-malu hadi’a estrada, maibé to’o tempu udan, estrada labele utiliza ho di’ak, tanba nakonu ho tahu.

Suku Raiheu iha aldeia tolu mak hanesan, Darabasa, Oho-Anan no Lete-Aitutu ho totál populasaun 1.717 no uma-ka’in 356.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here