Diretór SMAS Bobonaro, Adriano da Cruz. Imajen Tatoli/Sérgio da Cruz.

BOBONARO, 13 setembru 2021 (TATOLI)—Hahú hosi fulan juñu to’o agostu, Serbisu Munisipál Água no Saneamentu (SMAS) Bobonaro, hatama reseita ba kofre Estadu hamutuk $4.077,50.

“Reseita ne’e kontribui hosi kliente sira, ligadu ho utilizasaun tarifáriu bee moos, bisnis, sosiál no ligasaun foun,” Diretór SMAS Bobonaro, Adriano da Cruz, informa ba jornalista, iha kna’ar fatin, Soso Maliana, segunda ne’e.

Notísia relavente:Eletrisidade iha Bobonaro mate-lakan tanba poste tolu monu iha Atabae

Tinan ne’e, SMAS Bobonaro hatama reseita ba kofre Estadu menus, tanba metru kontadór 1.100-resin ne’ebé antes ne’e instala ba komunidade, balun avaria no barak mak la funsiona ona.

Situasaun ne’e mosu  tanba situasaun Governasaun, bee la sufisiente no mos atitude komunidade dezliga instalasaun tuir hakarak, nune’e fó impaktu ba ema balun labele hetan bee, ikus-mai hamonu reseita.

Maski nune’e, diretór ne’e esforsu nafatin atu buka meiu ho parseiru-sira onsá kliente-sira iha kapitál Maliana, bele kontribui hasa’e taxa ba Estadu.

Tuir kustu administrasaun, ba Kliente sira kada fulan selu tarifa normál $2,80 sentavu, maibé ba kliente ne’ebé utiliza metru kontadór sei selu depende ba gastu.

Diretór ne’e mós rekoñese katak, durante tempu bailoron naruk, SMAS labele fornese bee moos ba komunidade kada loron, tanba volume bee iha sistema gravitasaun hosi Beremau, Galisapulu, Lugululi, Atugalai, Aikumu no Aikumu, la fusiente.

Problema ne’e akontese tanba mudansa klimátika, halo ai-horis besik bee matan hahú menus no komunidade mós laiha konsiénsia hodi tesi ai estraga.

“Entaun fontes alternativa ne’ebé suporta bee ba komunidade Maliana tomak mak irrigasaun Maliana 1, maibé tanba ita utiliza bomba manuál, supa hosi tanki SAS tuan ba, tanki rejervatoriu Santa Cruz no Pemancar, entaun ita labele fornese oras 24, obrigatóriu ita distrubui loron rua dala ida,” nia hateten.

Labele utiliza bomba elétrika illegál

Parte SMAS apela ba komunidade Bobonaro, liu-liu iha kapital Maliana, labele utiliza bomba elétrika illegál hodi asesu bee moos.

Durante SMAS konsege halo apreensaun ba sasan sira-ne’e, maibé iha etapa ida-ne’e buka konsiensializa kliente, nune’e estrega fila-fali no husu nafatin labele uza tanba ema hotu iha direitu atu asesu bee moos.

Bainhira utiliza bomba elétrika illegál, sei fó impaktu ba kliente seluk labele hetan bee moos ho di’ak, alende ne’e, impaktu mós ba sira bele selu multa doubru to’o $80.

Oras ne’e daudaun SMAS transforma ona ba BTL,EP, sei hadi’a sistema serbisu, no ekipa tékniku sei  tama sai bairru hodi halo kontrolu ba komunidade ne’ebé halo ligasaun illegál ho mákina bomba elétrika tuir sira nia hakarak.

Bainhira ekipa idetifika, sei dezliga provizóriu, no sei bolu kliente ne’e mai presta deklarasaun, nune’e bele hatene prosedimentu tékniku, foin deside aplika multa tuir kustu administrasaun ba selu iha BNCTL atu bele instala fila-fali.

Desizaun ne’e bazeia ba dekretu lei númeru 4/2004, kona-bá regula bee moos iha área urbana to’o área rurál  liu hosi diploma ministeriál aplikasaun tabela tarifária ho ninia koima, tuir infrasaun ne’ebé nia komete.

Desde ezisténsia to’o agora, SMAS instala ona sistema bee moos hamutuk 162  iha aldeia 193 no suku 50 iha postu administrativu neen, munisipiu Bobonaro, maibé dadus ne’e la inklui projetu ne’ebé PNDS implementa iha suku hotu.

Tuir sensu uma-ka’in 2015, totál populasaun iha Munisípiu Bobonaro hamutuk 97.762 kompostu hosi mane 48.875 no feto 48.887.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here