Diretór Edukasaun RAEOA, Daniel Mauno. Imajen Tatoli/Abilio Elo Nini.

OÉ-CUSSE, 13 setembru 2021 (TATOLI)—Diretór Edukasaun Rejiaun Administrativa Espesiál Oé-Cusse Ambeno (RAEOA), Daniel Mauno, informa edukasaun RAEOA suspende aula prezensiál ba semana ida tán, tanba dadus COVID-19 iha Oé-Cusse sei mantein ho numeru aas.

“Tuir loloos, ohin (segunda (13 .09), ita reativa fali aula prezensiál maibé ha’u simu orientasaun hosi Sekretáriu Rejionál Asuntu Edukasaun no Solidariedade Sosiál no Inkluzaun atu kontinua suspende-tan ba semana ida. Suspensaun ne’e, sura hosi ohin to’o loron 20 setembru. Iha posibildade bele re-ativa ka suspende-tan,” Daniel Mauno informa ba Agênsia Tatoli iha Santa Rosa, Oé-Cusse, segunda ne’e.

Tanba ne’e, nia husu ba dirijente eskola sira atu mantein nafatin dixipliña no pasiensia hodi hein despaixu foun hosi autoridade bainhira mak reativa fali atividade eskolár.

Nia husu ba estduante no manorin sira atu hakbesik aan ba fasilidade saúde atu simu vasina no mantein dixiplina uza máskara, fase liman bebeik no distansiamentu fiziku.

Nia apela mós ba kandidatu ezame nasionál sira atu uza tempu feriadu ne’e bele prepara-aan didi’ak hodi estuda, tanba kalendáriu ezame nasionál sei akontese iha fulan tolu oin mai, bainhira kazu COVID-19 menus ona.

Entretantu iha loron segunda 13 setembru ne’e, Sentru Informasaun COVID-19 RAEOA rejista kazu pozitivu tolu (3), ativu 52 no rekoperadu 196.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here