Diretór Jerál Servisu Rejistu Notariadu, Crisogno da Costa Neto. Imajen Tatoli/Egas Cristovão.

DILI, 13 setembru 2021 (TATOLI)—Diresaun Jerál Serbisu Rejistu Notariadu (DJSRN), serbisu hamutuk ho Fundu Nasaun Unidade ba Infânsia (UNICEF), sei hala’o rejistu moris ba labarik iha munisípiu haat hanesan Lautém, Manatuto, Ermera no Manufahi.

“Kooperasaun ho UNICEF agora hein materiál rejistu hanesan livru asentu sertifikadu ne’ebé sira halo hela prosesu tenderizaun, bainhira kompañia fornese ona maka, sei hahú halo rejistu,” Diretór Jerál Serbisu Rejistu Notariadu, Crisogno da Costa Neto, hateten ba jornalista Agência Tatoli, segunda ne’e.

Notísia relevante:Japaun Apoiu Millaun $2.5 Ba Projetu Rejistu Moris

Durante ne’e diresaun konservatóriu serbisu munisípiu hala’o atendimentu regularmente iha de’it edifísiu munisipál, maibé ho projetu kooperasaun ho UNICEF, sei tun direta to’o suku iha área rurál.

Antes ne’e, diresaun serbisu notariadu ho UNICEF hala’o ona rejistu iha munisípiu Aileu, Baucau, Bobonaro, Viqueque no Rejiaun Administrativa Espesiál Óe-cusse Ambeno (RAEOA).

Iha tinan 2018, Governu Japaun asina ona akordu  ho Governu Timor-Leste (TL), liuhosi Ministériu Justisa (MJ), hodi apoiu fundu millaun $2.5 no parseria ho UNICEF, hodi implementa projetu rejistu moris ba labarik iha territóriu nasionál.

Projetu ne’e atu identifika labarik ida-idak, hodi fornese serbisu sosiál bázika hanesan saúde, edukasaun no seguransa sosiál, asegura direitu umanu fundamentál,maibé mós atu realiza dezenvolimentu sustentável liu hosi  kuidadu no proteze rekursu umanu  iha perspetiva lu’an.

Hahú hosi 2018 to’o agora, rejistu ona labarik ho idade 0-5 hamutuk 80%  por volta 15.000 iha territóriu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here