Ministru Turizmu, Komérsiu no Indústria, José Lucas do Carmo da Silva, hato’o liafuan badak ba ekipa delegasaun hosi Timor-Leste bá Dubai, iha salaun Expo Dubai, Kampung Alor, segunda segunda (13/09). Imajen TATOLI/Egas Cristóvão

DILI, 13 setembru 2021 (TATOLI)—Ministériu Turizmu, Komérsiu no Indústria (MTKI) no Autoridade Nasionál Timor-Leste ba Expo Dubai 2020 (ANED-TL), ofisialmente husik delegasaun ne’ebé kompostu hosi ema na’in-14, hodi aranka aban bá Dubai, Emiradu Árabe Unidu (EAU) hodi halo preparasaun expozisaun.

Expozisaun mundiál ne’e sei realiza iha loron entre 01 outubru 2021 to’o loron 31 marsu 2022, ne’ebé hanesan espozisaun mundiál dahuluk iha Médiu Oriente.

Ministru Turizmu Komérsiu no Indústria, José Lucas do Carmo da Silva. Imajen TATOLI/Egas Cristóvão

Ministru Turizmu, Komérsiu no Indústria, José Lucas do Carmo da Silva, hateten ekipa hirak ne’e sei halo funsaun iha paviliaun Timor-Leste nian.

“Iha responsabilidade boot atu hatene, esplika, no reprezenta nasaun, tanba ne’e imi bá lori buat todan ida iha ita-boot sira-nia kaba’as,” Ministru dehan iha edifísiu Expo Dubai 2020, Kampung Alor, segunda ne’e.

Notísia relevante: MKAE prezide reuniaun koordenasaun ba preparasaun Expo Dubai 2020

Governante ne’e husu ba ekipa atu hatudu espíritu nasionalizmu hodi promove Timor-Leste di’ak liu, nune’e bele dada investidór sira bele mai investe.

“Ita-boot sira importante maka tenke hatudu buat diferente iha atividade Expo Dubai no ita-boot sira maka na’in ba sasán sira ne’e, tanba ne’e tenke domina sasán sira ne’ebé maka promove iha ita-nia paviliaun,” Ministru hameno.

Autoridade Nasionál Timor-Leste ba Expo Dubai 2020 (ANED-TL) no Koordenadór Jerál, Manuel Vong. Imajen TATOLI/Egas Cristóvão

Iha fatin hanesan, Autoridade Nasionál Timor-Leste ba Expo Dubai 2020 (ANED-TL) no Koordenadór Jerál, Manuel Vong, hateten, hosi parte preparasaun iha Timor-Leste preparadu.

“Produtu ne’ebé maka atu halo promosaun iha Expo Dubai, daudaun prepara hotu atu hein lori de’it,” nia akresenta.

Iha biban ne’e, ekipa ne’ebé sei aranka bá Dubai halo simulasaun atende konvidadu sira iha expozisaun mundiál ne’e.

Eventu globál ne’e ho lema ‘Tau neon hamutuk, hodi harii futuru’, ho sub-tema ‘Mobilidade, Sustentabilidade no Oportunidade’, ne’ebé Timor-Leste sei marka prezensa iha área temátika ‘Oportunidade’ ho tema ‘Timor-Leste, Explore the undiscovered’ 

Ekipa delegasaun atu aranka ba Dubai halo simulasaun atendimentu iha expozisaun, iha salaun Expo Dubai 2020, Kampung Alor, segunda (13/09). Imajen TATOLI/Egas Cristóvão

Timor-Leste lori produtu hamutuk 50 resin hodi aprezenta iha expozisaun no ba komersializa hamutuk iha produtu 100 resin, ne’ebé kompostu hosi produtu agríkola, artezenatu, minerál no produtu tais, ne’ebé la’os lori ba fa’an de’it, maibé atu hatudu identidade no kultura Timor-Leste.

Iha loron 15 to’o 16 outubru, Timor-Leste sei realiza ‘bussiness forum’ hodi aprezenta setór haat hodi bele atrai investidór sira mai vizita no halo investimentu.

Hahú hosi faze abertura to’o enseramentu, iha ajenda lubuk mak nakloke ba Timor-Leste atu bele partisipa liuhosi liña ministeriál ho área prinsipál haat mak hakarak promove hanesan turizmu, agrikultura, transporte lojíztika, petróleu no minerál.

Timor-Leste mós sei envolve setór privadu sira ne’ebé investe ona iha rai-laran, tantu iha transporte, turizmu, petróleu, agrikultura no seluk tan, atubele atrai investidór seluk mai investe atu garante ba investidór sira seluk katak investe iha nasaun ne’e seguru.

Objetivu Timor-Leste partisipasaun Expo Dubai tanba hakarak iha efeitu multipikadór, ne’ebé sei akontese iha setór turizmu, petróleu no minerál, agrikultura no seluk tan.

Iha área expozisaun, Timor-Leste hetan ona espasu atu halo aprezentasaun produtu iha espozisaun ne’e ho luan metru 250, ne’ebé oferese gratuitu no apartementu inklui viza ba ema importante iha Timor-Leste atu partisipa iha eventu ne’e.

Área ba espozisasaun ne’e kuaze ektare 438 iha Dubai Exhibition Center no sei partisipa hosi nasaun 192 inklui Timor-Leste.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here