Edifísiu Sentru Nasionál Formasaun Profisionál (CNFP, sigla portugés) Becora. Imajen TATOLI/Nelia Fernandes.

DILI, 13 setembru 2021 (TATOLI)—Diretór Sentru Nasionál Formasaun Profisionál (CNFP-sigla portugés) Becora, Lourenço da Silva Gusmão, informa sentru ne’e hahú filafali atividade formasaun tanba Governu hakotu ona konfinamentu domisiliáriu iha Munisípiu Díli.

Notísia Relevante: Konfinamentu domisiliáriu: CNFP Becora suspende atividade formasaun

“Ohin, aminia atividade formasaun la’o ona, no formandu sira mós tuir ona formasaun ba loron ohin nian,” Lourenço da Silva Gusmão hateten ba Agência Tatoli, via telefónika, segunda ne’e.

Durante tuir formasaun, formandu sira nafatin kumpre regra prevensaun COVID-19 hosi Ministériu Saúde no Organizasaun Mundiál Saúde (OMS) hodi fase liman, uza maskára, no halo distansiamentu sosiál.

Entretantu, Xefe Departamentu Sentru Nasionál Formasaun Profisionál (CNFP-sigla portugés) Becora, Noel Osório Sanches, informa iha sentru ne’e totál formandu hamutuk na’in-295 ne’e formandu 284 mak kompleta ona vasina no falta na’in-11 hein atu kompleta vasina ba segundu doze.

Enkuantu, totál funsionáriu no formadór hamutuk na’in-54 no hosi númeru ne’e, ema na’in-51 mak kompleta ona vasina no na’in tolu hein atu kompleta vasina ba segundu doze nian.

Aleinde ne’e, nia esplika, iha sentru ne’e bainhira formandu sira tuir formasaun iha fatin ne’e tenke $10 tanba osan refere atu utliza ba prodús sertifikadu no farda ba formandu sira.

“Selu ba farda, tanba durante sira tuir formasaun durante fulan ne’en ne’e, sira tenke uza farda, hafoin tuir formasaun. Sira sei ba halo estájiu durante fulan ida, tuir idakidak nia área iha instituisaun Governu no privadu ne’e parséria ho sentru ne’e,” nia dehan.

Totál formandu ne’ebé tuir formasaun ba tinan ne’e hamutuk na’in295, ne’ebé tuir formasaun konabá kanalizasaun, karpintaria, kustura, eletrisidade, informátika, mekanika motor, panifikasaun (halo dose), pedreiru, refrigerasaun, no soldadura.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here