Diretór CJRO, Deonizio Taek. Imajen TATOLI/Abílio Elo Nini.

OÉ-CUSSE, 13 setembru 2021 (TATOLI)—Sentru Juventude Rejiaun Oé-Cusse (CJRO, sigla portugés) daudaun ne’e simu ona proposta hamutuk 45 hosi grupu juventude sira iha sub-rejiaun Pante Makasar, Oésilo, Passabe no Nitibe, hodi partisipa iha atividade emprendorizmu sosiál atu motiva joven sira hasa’e sira-nia kreatividade

“Proposta ne’ebé Sentru Juventude Rejiaun Oé-Cusse simu hosi grupu juventude sira hosi suku sira iha sub-rejiaun sira submete ba atividade emprendorizmu hamutuk grupu 45,” Diretór CJRO, Deonizio Taek, informa ba Agência Tatoli iha Santa Rosa, Oé-Cusse, segunda ne’e.

Grupu juventude 45 ne’e kompostu hosi sub-rejiaun Pante Makasar submete proposta 24, sub-rejiaun Nitibe submete ualu (8), sub-rejiaun Oésilo submete 10 no sub-rejiaun Passabe submete tolu (3).

Tuir CJRO nia planu, loloos ne’e persiza de’it proposta 30 hanesan hosi grupu juventude sub-rejiaun Pante Makasar grupu 10, sub-rejiaun Nitibe grupu 10, sub-rejiaun Oésilo grupu lima (5) no sub-rejiaun Passabe lima (5) maibé daudaun ne’e balu liutiha ona trajetu.

Ezemplu, nia dehan, hosi Passabe loloos iha proposta lima (5) maibé agora foin tolu (3), hosi sub-rejiaun Oésilo tuir loloos lima (5) maibé daudaun ne’e sira submete liu ona 10 no iha sub-rejiaun Nitibe tuir loloos presiza 10 maibé daudaun ne’e foin ualu (8), entaun sei loke-tan oportunidade ba sub-rejiaun Passabe ho Nitibe atu kompleta tán.

“Hosi grupu 45 ne’e, ita sei halo aproximasan ba grupu hotu-hotu ne’ebé mak submete ona sira-nia proposta atu halo avaliasaun ba proposta sira-ne’e. Rezultadu ikus, ita sei hatene loloos ba grupu ne’ebé mak iha posibilidade atu hetan apoiu fundu emprendorizmu ba trajetu grupu 30 ba tinan ne’e,” nia dehan.

Entretantu proposta hirak ne’e barakliu ba atividade agrikultura nian hanesan pekuaria, peska inklui atividade hortikultura tanba grupu barak mak kuda modo, balun hakiak animál, balun haki’ak ikan no balun halo turizmu komunitária iha nivél suku no aldeia.

Atu finansia programa emprendorizmu ba grupu 30 ne’e, daudaun ne’e CJRO prepara ona fundu hamutuk rihun $30 ne’ebé hetan apoiu hosi Sekretáriu Estadu Juventude no Desportu (SEJD).

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here