CIGC hamutuk ho família uza protesaun pesoál molok haloot mate-isin GC, iha nia fatin moris iha suku Uma Ana Iku, postu Venilale, segunda (13/09). Imajen : TATOLI/Natalino Belo

BAUCAU, 13 setembru 2021 (TATOLI)–Responsável pilar 7 Sala Situasaun, Sentru Intergradu Jestaun Krize (CIGC, sigla portugés) Baucau, Verónimo Ornai, hateten, ekipa saúde  ohin entrega ona matebian GC ba família hafoin hakotu-iis iha izolamentu eis SPK, iha loron sábadu (11/09).

“Pasiente mai halo tratamentu iha Hospital Rejional Eduardo Ximenes (HorEX) ho moras insufisiensia respiratória aguda, ipertensaun, no asosiasaun ho vírus COVID-19 pozitivu. Durante iha izolamentu ekipa halo atendementu másimu maibé iha loron sábadu (11/09) tuku 21:12 kalan hakotu iis iha izolamentu,” Responsável pilar 7, hateten, iha izolamentu eis SPK Villa antiga segunda ohin.

Verónimo esplika, tuir loloos horiseik (12/09) matebian transporta sai hosi izolamentu, maibé tanba kondisaun klima, udan to’o kalan, entaun ohin dadeer mak lori sai mate-isin liuhosi konkordánsia entre CICG no família.

“CIGC Baucau serbisu hamutuk ho família atu hala’o prosesu funeráriu ho di’ak no tuir protokolu saúde mundiál, hanesan uza protesaun pesoál,” nia akresenta.

Iha fatin hanesan, Reprezentante família matebian, Mateus Varela dos Santos Freitas, hateten, família deside matebian GC halo tratamentu iha ospitál tanba kondisaun moras dada iis ladi’ak maibé hafoin teste swab deteta pozitivu COVID-19.

“Ami família servisu hamutuk ho saúde no prontu atu lori ba haloot iha nia fatin moris, tanba matebian labele rai kleur pois estraga, entaun ami konkorda lori matebian ba haloot,” Mateus hatutan.

Família mos husu atu CIGC nasionál atu rekruta ekipa haloot mate-isin, nune’e labele envolve tan família tanba iha risku kontájiu boot ba COVID-19.

Matebian GC (mane) rasik hosi aldeia Uaitununau, duku Uma Ana Iku, postu administrativu Venilale, ne’ebé iha loron 11 setembru diagnostikadu ho sindroma insufisiensia respiratóriu aguda tanba COVID-19 no matebian mós sofre moras ipertensaun, nune’e ikus mai hakotu iis.

Munisípiu Baucau to’o agora rejista ona óbitu COVID-19 hamutuk na’in-lima, ne’ebé na’in-tolu hakotu iis iha Baucau no na’in-rua iha Dili maibé deteta pozitivu iha Baucau.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here