Autoridade Munisípal Bobonaro, presta omenjen ba mate-isin, Manuel Martins ‘Manekas’, iha salaun administrasaun munisípal, segunda (13/09/21). Imagen Tatoli/Sérgio da Cruz.

BOBONARO, 13 setembru 2021 (TATOLI)—Autoridade munisipál Bobonaro, agradese ba kontribuisaun hosi matebian Manuel Martins ‘Mankas’, nu’udár funsionáriu Programa Nasionál Dezenvolvimentu Suku (PNDS) Bobonaro, ne’ebe dedika an hahú hosi 2013 to’o hakotu-iis iha domingu 12 setembru tinan ne’e.

“Agradese ba matebian nia kontribuidaun, tanba dedika an hodi kontribui ba munisípiu Bobonaro, liu hosi PNDS, durante tinan barak,” Sekretária Autoridade munisipál Bobonaro, Júlio Carvalho Caero, hateten bainhira família lori mate-isin ba vizita ikus, serbisu fatin administrasaun munisipál Bobonaro, segunda ne’e.

Notísia relevante:PNDS implementa ona projetu 973 iha territóriu nasionál

Parte autoridade nota katak, durante sei moris, matebian ema ida ne’ebé hatudu serbisu ho badinas, disiplina, respeitozu, dedikdu, profesionál no sempre kumpre orientasaun hosi ninia superiór-sira.

Istória moras, iha fulan kotuk matebian sente isin-manas ho temperatura moderadu, no ba halo tratamentu saúde iha ospitál, iha teste swab rezultadu PCR hatudu positivu Covid-19.

Nune’e, médiku-sira deside transporta ba izolamentu Verra Cruz, hodi kumpre protokolu saúde durante fulan ida, hahú hosi 09 agostu to’o hakotu-iis iha 12 setembru ho rezultadu negative Covid-19, no SIJK deside entrega mate-isin ba família hodi halo’ot tuir lisan Marobo.

Matebian hahú serbisu iha PNDS Bobonaro, iha 2013 to’o hakotu-iis, antes ne’e mós serbisu hanesan, profesór, dosente iha UNTL no serbisu iha ADN, ikus hokotu-iis ho profisaun tékniku, ka enjiñeiru kampu durante tinan ualu.

Metebian, moris iha suku Marobo, postu administrativu Bobonaro, munisípiu Bobonaro, iha 09 abríl 1980, mate ho idade 41, husik hela feto faluk ho kondisaun gravida no oan ki’ak na’in-haat kompostu hosi feto rua no mane rua.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here