Sekretariu Jeral Asosiasaun Futsal Timor -Leste (AFTL) Fernando Baptista Xavier. Imajen/Espesiál

DILI, 13 setembru 2021 (TATOLI) – Sekretáriu Jerál Asosiasaun Futsal Timor – Leste (AFTL), Fernando Baptista, hateten iha loron 25 setembru ne’e, sei re-ativa hikas jogu Pra Liga Futsal.

“Ita hatene konfinamentu obrigatóriu hotu ona, hosi regra ida hasai hosi ita nia Governu ne’e bele hala’o atividade desportu sira, maibé mantein nafatin regra saúde nian, ami estrutura AFTL halo ona enkontru hodi halo preparasaun ba re-ativa hikas jogu iha  loron 25 setembru semana oin,” Fernando ba Agência Tatoli iha Bairru Formosa, Dili, segunda ne’e.

Nia dehan, material ba prevensaun Covid-19 haraik hotu hosi Federasaun Futeból Timor – Leste (FFTL) mak hanesan prepara bee ba jogadór sira fase-lima no ekipamentu seluk ne’ebé durante jogu jogadór no ofisial klube sira sei utilize.

Alende hasai ona oráriu fiksu AFTL mós fó biban semana ida ba klube sira hala’o treinamentu liu-liu fíziku, tanba durante serka sanitária no konfinamentu obrigatóriu halo jogu paradu tempu naruk liu.

Kampu ba hala’o jogu utilize nafatin kampu multifunsaun FALINTIL-Forsa Defeza Timor – Leste (F-FDTL), Fatuhada, Dili ne’ebé antes ne’e uza ba hala’o ona jogu.

Jogu ne’e sei akumula klube hamutuk 24  mak hanesan, Boavista FC Timor, Baucau ALL Star, Boa Sorte FC, Becusse United, Caesardante FC, FC B’TAL, FC Beremeta, FC FIEL, FC Estrela Baguia, Crazy Horse, FC Coelho, Mau Putar FC, Kuda Ulun FC, São Francisco FC, FC Samoro, M-V D.L, Maudoko FC, Kablaki FC, Jerman FC, Santa Cruz FC, Ramelau FC no Mushila FC.

Jornalista       : Hrotencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here