Prezidente Parlamentu Nasionál, Deputadu Aniceto Longuinhos Guterres Lopes, no delegasaun hala’o enkontru ho Sekretáriu Ezekutivu CPLP, Zacarias Albano da Costa, iha sede CPLP, Lisboa, sesta (10/09). Imajen/Relasaun Públika Parlamentu Nasionál

DILI, 11 setembru 2021 (TATOLI)–Prezidente Parlamentu Nasionál (PPN), Deputadu Aniceto Longuinhos Guterres Lopes, iha sesta ne’e, hala’o reuniaun ho Sekretáriu Ezekutivu Komunidade País ho Lian Portugés (CPLP, sigla portugés), Zacarias Albano da Costa, iha Lisboa, Portugal.

“Husu atu Timor-Leste kumpre kompromisu sira atubele selu kuota hodi fó susesu ba Sekretáriu Ezekutivu nia mandatu tinan-rua ne’e,” PPN hato’o asuntu ne’e bainhira hasoru malu ho Zacarias  Albano, hanesan haktuir iha nota ne’ebé Agência TATOLI asesu hosi Relasaun Públika Parlamentu Nasionál, sábadu ne’e.

Notísia relevante: Prezidente Parlamentu 110 partisipa konferénsia dalimak iha Áustria

Biban ne’e, parte rua diskute mós kona-ba kooperasaun multilaterál no partilla informasaun kona-ba enkontru no konferénsia sira tuir mai, ne’ebé sei realiza iha Fransa iha fulan-novembru no enkontru entre Prezidente Parlamentu sira iha Bali, iha marsu 2022.

Nune’e, Timor-Leste mak sei simu delegasaun CPLP nian iha Timor-Leste hodi hala’o reuniaun iha provínsia bali, Indonézia.

Enkontru parlamentár iha Timor-Leste atu lori CPLP hanoin hamutuk kona-ba oinsá kombate terrorizmu, mudansa klimátika inklui pandemia COVID-19 hanesan kooperasaun multilaterál.

Durante enkontru PPN akompaña hosi Vise-PPN, Luís Roberto da Silva, Deputadu António da Conceição, inklui delegasaun seluk.

Iha oportunidade ne’e, Sekretáriu Ezekutivu CPLP, Zacarias Albano da Costa, apresia vizita PPN no delegasaun, nu’udar alta entidade dahuluk hosi Timór ne’ebé vizita sede CPLP, Lisboa.

Sekretáriu Ezekutivu iha esperansa Estadu Timor-Leste kontinua apoia misaun iha rai-li’ur.

Aleinde ne’e, PPN no delegasaun sei presta omenajen ba falesimentu Antigu Prezidente Repúblika Portugal, Jorge Sampaio.

Jornalista : Evaristo Soares Martins

Editora      : Julia Chatarina

HAKEREK NO HATÁN

Please enter your comment!
Please enter your name here