Antigu Prezidente Repúblika Portugal, Jorge Sampaio. Imajen/Epesiál

DILI, 11 setembru 2021 (TATOLI)Deputadu Bankada FRETILIN, José Agostinho Siqueira ‘Somotxo’ sente triste rona Antigu Prezidente Portugal, Jorge Sampaio, hakotu iis iha sesta ne’e, tanba ne’e nia konsidera Parlamentu Nasionál (PN) iha obrigasaun morál fó omenajen ikus ba saudozu ne’e.

Somotxo nu’udar guerrilleiru no Deputadu, manifesta nia konsternasaun ba Timor-Leste nia belun boot ne’ebé sempre iha timor-oan sira-nia sorin, iha tempu rezisténsia hasoru okupasaun Indonézia, sempre defende no ko’alia iha fórum internasionál kona-ba direitu auto-determinasaun timor-oan sira-nian ba liberdade no independénsia.

“Povu Portugés no Povu Timor-Leste Lakon figura polítiku ne’ebé husik ninia memória wain tebes ba povo ne’e nia istória. Tanba ne’e, Parlamentu Nasionál iha obrigasaun polítika no morál hodi hasai votu pezár iha plenária ba falesimentu Jorge Sampaio, nu’udar rekoñsimentu ikus hosi povu timor-oan ba ninia Belun Boot,” Somotxo hateten ba Agência TATOLI, sábadu ne’e.

Notísia relevante: PM Taur espresa profundu pezar ba Jorge Sampaio nia mate

MNEK hato’o sentidu kondolénsia ba família Portugés


Bainhira iha hela ai-laran, Deputadu Bankada Governu ne’e, akompaña Antigu Xefe Estadu ne’e ninia diskursu no intervensaun iha mídia internasionál, ne’ebé sempre defende timor-oan sira.

“Ha’u koñese no hasoru malu iha Portugal hafoin referendu no Setembru Negro iha Timor-Leste,” nia dehan.

“As pessoas morrem, a sua memória e obra ficarão na memória dos que viveram e conviveram com ele. Os meus profundos Pêsames. Coragem e força á Família enlutada,” Somotxo espresa sentidu kondolénsia ba família matebian.

Nune’e mós, Vise-Xefe Bankada KHUNTO, Deputadu António Verdial de Sousa, hato’o sentidu profunda ba líder polítiku ne’e nia mate tanba Portugal lakon líder di’ak ida, nune’e mós ba Timor-Leste, tanba Jorge Sampaio ninia kontribuisaun boot tebes ba luta libertasaun Timor-Leste.

“Haree ba istória pasadu, Jorge Sampaio fó ninia solidariedade mai Povu Timor-Leste, tanba ne’e maka laiha razaun atu Parlamentu Nasionál la halo votu pezár. Hanesan Deputadu nafatin iha solidariedade no husu meza parlamentu tenke organiza atu Parlamentu Nasionál realiza sesaun solene hodi hato’o votu pezár ba matebian Jorge Sampaio,” nia propoin.

Deputada Bankada PLP, Deputada  Domingas dos Santos, hateten, Timor-Leste no Portugal lakon líder polítika ne’ebé sempre enkoraja timor-oan sira ba prosesu luta ba libertasaun nasionál.

“Hato’o ha’u-nia profunda sentidu kondolénsia ba família no povu portugués ba falesimentu Antigu Prezidente Repúblika Portugal, Jorge Sampaio,” Deputada Domingos dos Santos dehan.

Prezidente Parlamentu Nasionál ein ezersísiu no atuál Vise-Prezidente Parlamentu Nasionál, Deputada Maria Angelina Lopes Sarmento, sei hato’o informasaun formál kona-ba kestaun ne’e.

“Segunda ka tersa mak ha’u bele halo deklarasaun ofisiál de’it ba mídia,” nia informa ba Agência TATOLI.

Antes ne’e, iha tinan 2006, PN Timor-Leste atribui títulu sidadaun onoráriu Repúblika Demokátika Timor-Leste ba Jorge Sampaio.

Eis Prezidente Repúblika Jorge Sampaio mate iha ospitál Lisboa, ho idade tinan 81, tanba hasoru difikuldade respiratória.

Jorge Fernando Branco de Sampaio moris iha Lisboa, iha loron 18 setembru 1939, hanesan oan hosi Arnaldo Sampaio, ne’ebé koñesidu nu’udar médiku iha saúde públika no Fernanda Bensaúde Branco de Sampaio, nu’udar profesora lian inglés.

Jornalista : Evaristo Soares Martins

Editora     : Julia Chatarina

HAKEREK NO HATÁN

Please enter your comment!
Please enter your name here