Administradór Manatuto, Bernardo Lopes. Imajen TATOLI/Arminda Fonseca

DILI, 11 setembru 2021 (TATOLI)-Munisípiu Manatuto propoin adisionál millaun $6,5 iha Orsamentu Jerál Estadu (OJE) 2022 durante diskusaun Komité Revizaun Orsamentu Polítika (KROP) hodi halo rekuperasaun infraestrutura ne’ebé a’at kauza dezastre naturál ne’ebé akontese iha loron 04 abríl.

Administradór Munisípiu Manatuto, Bernardo Lopes, hateten, tetu orsamentu tinan oin hamutuk milliaun $3,5, ne’ebé hosi orsamentu ne’e iha kategoria rua de’it saláriu vensimentu no despeza operasionál, enkuantu kapitál menor no kapitál dezenvolvimentu laiha.

“Entaun hato’o proposta adisionál tanba kapitál menor no dezenvolvimentu mak laiha signifika autoridade sira laiha knaar. Tanba ita-nia planu prioridade mak halo rekuperasaun ba dezastre naturál ne’ebé foin lalais akontese, tanba Manatuto hanesan munisípiu ne’ebé afetadu liu ba kalamidade, nune’e ita husu adisionál atu halo reabilitasaun ba irrigasaun haat tanba atu halo konstrusaun foun ne’e osan la to’o no presiza tempu naruk,” Autoridade munisipál ne’e informa ba Agência TATOLI, iha Ministériu Finansa, Aitarak-laran, sábadu ne’e.

Tanba ne’e, nia iha esperansa orsamentu adisionál ne’e bele aprova tanba maioria komunidade Manatuto moris ho atividade agrikultura.

“Bainhira orsamentu ne’e la aprova sei la halo buat ida, liuliu komunidade labele halai tan natar tanba irrigasaun no komunidade nia natar hetan estragu hotu, enkuantu totál grupu agrikultór iha Manatuto hamutuk rihun 57, ne’ebé hosi grupu ne’e misturadu la’ós iha área natar de’it,” nia akresenta.

Aleinde ne’e, nia dehan, orsamentu adisionál ba planu prioridade seluk hanesan reforsa parte saúde.

“Liuliu COVID-19, tanba Manatuto nu’udar munisípiu ne’ebé sentrál hosi oeste ba leste no hosi sul mai norte, entaun tenke halo esforsu maka’as tanba durante mosu COVID-19 ne’e Manatuto sai munisípiu ne’ebé ho risku kompara ho munisípiu sira seluk,” nia hatutan

Jornalista : Arminda Fonseca

Editora      : Julia Chatarina

HAKEREK NO HATÁN

Please enter your comment!
Please enter your name here