Xefe Suku Uaitame, José do Rosário. Imajen TATOLI/Vitorino Lopes da Costa

VIQUEQUE, 11 Setembru 2021 (TATOLI)—Mobilizasaun materiál konstrusaun Uma Kbiit Laek (UKL) tolu iha aldeia Sana, suku Uaitame postu adiministrativu Uatulari, munisípiu Viqueque, seidauk realiza tanba kondisaun udan difikulta movimentu transporte.

“Suku seluk ita haree prosesu konstrusaun la’o, maibé ami-nia seidauk la’o tanba distánsia bá Sana dook no agora udan tan, nune’e karreta lori tama materiál mós seidauk. Tanba ne’e maka agora seidauk konstrui,” Xefe suku Uaitame, José do Rosário, informa, ba Agência TATOLI, iha Viqueque, sábadu ne’e.

Tuir líder komunitáriu ne’e, kotasaun ba kontrusaun UKL foti iha fulan-agostu no prepara ona ba kontrusaun inklui kompañia hahú hatama materiál, maibé udan tun halo kondisaun estrada liga ba Sana grave tebes.

Maibé UKL iha suku balun ne’ebé lokalizadu iha estrada kontinua konstrusaun, maski daudaun ne’e mosu mudansa klimátika ne’ebé akontese iha territóriu inklui munisípiu Viqueque.

Iha fatin seluk, Diretór Programa Nasionál Dezenvolvimentu Suku (PNDS), Estevão de Carvalho, hateten, udan ne’ebé akontese fó duni impaktu ba serbisu kontrusaun UKL, la’ós iha suku Uaitame de’it, maibé iha suku seluk mós seidauk.

“Problema udan difikula ba karreta asesu ba fatin kontrusaun. Maibé, ita-nia atividade konstrusaun balun la’o, iha suku balun de’it mak labele la’o tanba kondisaun estrada liga ba suku a’at no komunidade sira iha suku agora preokupa ba kolleta hare tanba udan mós afeta ba sira-nia hare. Entaun sira mós seidauk ba tau-matan. Maibé ha’u fiar katak kontrusaun iha Viqueque sei hotu,” nia dehan.

Enkuantu, progresu konstrusaun UKL iha postu Uatucarbau hosi suku Afaloica no Batata seidauk konstrui, suku Irabin de baixu atinje 60,75%, suku Irabin de Cima 39,29%, suku Loi-Ulu atinje 60,75% no suku Uani uma 60,75%.

“Progresu Uma Kbiit Laek iha parte Uatucarbau, suku rua mak seidauk konstrui to’o agora, hosi postu haat ne’e la’o, maibé hein semana ohin tékniku PNDS iha baze relata tan mai mak ami fó sai progresu ba públiku,” nia hatutan.

Jornalista : Vitorino Lopes da Costa

Editora     : Julia Chatarina

HAKEREK NO HATÁN

Please enter your comment!
Please enter your name here