Sekertáriu Estadu ba Asuntu Antigu Komabatente Libertasaun Nasionál, Gil da Costa Monteiro 'Oan Soru'. Imajen TATOLI/Francisco Sony

DILI, 11 setembru 2021 (TATOLI)-Governu liuhosi Ministériu Asuntu Kombatente Libertasaun Nasionál (MAKLN) hamutuk ho Sekretaria Estadu Kombatente Libertasaun Nasionál (SEAKLN) deside kansela pensaun ba veteranu benefisiáriu 416 tanba falsifika dokumentu balun.

“Tinan 2020, iha atividade fulan-ida de’it, ami konsege deteta ema 416 no ninia osan ami taka hotu, tanba iha inan rua, aman rua,” Sekretáriu Estadu Kombatente Libertasaun Nasionál, Gil Monteiro da Costa ‘Oan Soru’, hateten, iha seremónia inaugurasaun uma Veteranu Filipe Belo ‘Rai Lakan’, iha Metinaru, sábadu ne’e.

Governante ne’e haktuir, sira mai ho sertidaun orijinál ida ne’ebé uluk, maibé ida ne’ebé la’ós sira-nian inan ho aman, sira halo falsifika ba osan.

“Sira ba buka hatene no muda matebian sira-nia sertidaun iha fatin ne’ebé de’it, depende sira ba kaer toman, ikus mai sira hetan benefísiu. Maski Governu deside taka ona sira-nia pensaun, maibé to’o agora ida la ba edifísiu Sekretaria Estadu Kombatente Libertasaun Nasionál atu presta deklarasaun ruma,” nia akresenta.

Ba kestaun ne’e, Sekretáriu Estadu husu veteranu sira atu iha onestidade kona-ba dokumentu.

“Tanba de’it osan, ita bele nega ita-nia inan ho aman,” Oan Soru subliña.

Ho kestaun ne’e, nia apela ba Prezidente Konsellu Munisípiu Dili, Vise-Sekretáriu Zona Metinaro, inklui foinsa’e sira, fó sasin ne’bé di’ak ba veteranu sira-nia partisipasaun iha prosesu luta durante tinan 24.

“Ha’u hakarak aproveita fó hela mensajen ne’e e ba alin sira foinsa’e hotu iha ne’e, ida ne’ebé mak partisipa hateten loloos, ida ne’ebé mak la’e hateten ba malu,” nia akresenta.

Sekretáriu Estadu refere ba estatutu ne’ebé hateten kona-ba kombatente sira tenke kontribui ba estabilidade Estadu no nasaun inklui dezenvolvimentu nasionál no seguransa Estadu kontra umanidade, direitu sei lakon hotu.

“Nia lakon nia direitu tomak to’o osan ne’ebé nia simu mós sei devolve ba Estadu inklui medalla no kartaun entrega hotu. Ho lei ne’e, husu veteranu bainhira halo buat ida tenke sukat tanba hahalok ida hanesan ne’e sei fó dalan ba sira seluk atu halo tuir. Aban bainrua Konsellu Veteranu foti medida ruma karik tanke tama iha korredór ida-ne’e no tenke justifika,” nia esklarese.

Benefisiáriu ba pensaun veteranu no martir hamutuk 28.558, kompostu hosi Aileu 1.395, Ainaro 2.206, Baucau 4.136, Bobonaro 2.528, Covalima 1.424, Dili 2.119, Ermera 3.623, Lautem 2.420, Liquiçá 1.419, Manatuto 2.141, Manufahi 1.456, Oé-Cusse 404, Viqueque 3.256 no sidadaun timor-oan ne’ebé hela iha diáspora hamutuk 28.

Pensaun ba antigu kombatente hatuur ona iha dekretu-lei númeru 3/2006 no alterasaun dahuluk dekretu-lei 9/2009 estatutu kombatente libertasaun nasionál hodi fó rekoñesementu ba sidadaun hotu ne’ebé partisipa iha prosesu luta ba libertasaun nasionál.

Jornalista : Osória Marques

Editora     : Julia Chatarina

HAKEREK NO HATÁN

Please enter your comment!
Please enter your name here