GASC entrega tratór-liman fila-rai nian ida ba grupu HAFUCO, iha aldeia Macadai, sesta (10/09) Imajen/Espesiál

DILI, 11 setembru 2021 (TATOLI)-Gabinete Primeiru-Ministru liuhosi Gabinete Apoiu Sosiedade Sivil (GASC), entrega tratór-liman ida ba Grupu Haburas Futuru Komunidade (HAFUCO) iha aldeia Macadai, suku Triloca, postu administrativu Baucau villa, munisípiu Baucau, hodi hala’o atividade agrikultura no ortikultura.

Koordenadór GASC, Filipe da Costa, hateten, apoiu subvensaun ne’e ho montante $10.000, atu hala’o sira-nia knaar iha área agrikultura hodi kuda ai-han lokál nutritivu no área saúde atu fó ai-han ba labarik ho idade 5 mai kraik inklui hala’o atividade kooperativa.

“Ami transfere ona 40% ka ekivalente $4.000 hosi totál $10.000 ba Grupu HAFUCO, no hosi montante dahuluk ne’e mak hola tratór-liman ida. Ohin ha’u mai entrega ba grupu produtór atubele ajuda hala’o atividade agrikultura no ortikultura, ne’ebé tuir sira-nia proposta atu promove no halo produsaun ai-han lokál nutritivu, tein no fornese ai-han ba labarik sira hodi redús má-nutrisaun, inklui viveiru ba marungi,” Koordenadór GASC, informa, liuhosi nota ne’ebé Agência TATOLI asesu, sabadu ne’e. 

Objetivu prinsipál apoiu ne’e mak prodús ai-han lokál nutritivu, fornese konsumu gratuita ba labarik hodi hadi’a saúde, hasa’e rendimentu uma-kain hodi apoiu labarik-nia estudu, no habelar atividade ortikultura, liuliu viveiru marungi ba komunidade Triloca.

“Husu grupu HAFUCO atu garante manutensaun tratór-liman ne’e hodi bele utiliza ba tempu naruk, no mós apoiu komunidade to’os-na’in bainhira presiza atu fila-rai”, koordenadór GASC rekomenda. 

Iha biban hanesan, Koordenadora Grupu HAFUCO, Maria Idalina da Costa Tilman, agradese ba  apoiu tanba grupu ne’e halibur ema 11, ne’ebé durante ne’e fila-rai ho sistema tradisionál hodi kuda ai-han lokál nutritivu hanesan fehuk midar kór laranja, batar no modo sira ne’ebé tinan-ida sira kuda no kolleta dala-rua.

“Ha’u-nia grupu kontente tebes tanba ami hetan tan apoiu subvensaun públika hosi GASC atu hola tratór-liman ida ne’ebé ho folin $2.700, inklui osan ba manutensaun hamutuk $120 ba tinan-ida,” nia dehan.

Iha tempu hirak liubá, grupu produtór ne’e tenke aluga ema-nia tratór-liman hodi fila-rai ho presu $7 kada oras, ne’ebé implika tebes ba atividade kuda ai-han lokál. 

“Maibé agora ami hetan ona tratór, entaun ami la aluga tan ona no ami mós bele ajuda komunidade fila-rai, ho mekanizmu komunidade enxe gazóleu, inklui selu $10 ba kustu manutensaun.  Ho apoiu ne’e, sei aumenta volume produsaun ai-han lokál nutritivu hodi fornese ba labarik, hadi’a rendimentu uma-kain, fila-rai no viveiru marungi,” koordenadora HAFUCO subliña.

Tanba ne’e, HAFUCO nafatin iha esperansa atu garante sustentabilidade utilizasaun tratór-liman ne’e ba tempu naruk, liuhosi halo jestaun di’ak no halo manutensaun bainhira projetu ne’e remata.

Grupu HAFUCO nu’udar grupu komunitária ho maioria feto, ne’ebé estabelese iha aldeia Macadai iha tinan 2014, ho objetivu atu hadi’a rendimentu uma-kain liuhosi atividade agrikultura.

Jornalista : Arminda Fonseca

Editora     : Julia Chatarina

HAKEREK NO HATÁN

Please enter your comment!
Please enter your name here