Prezidente Autoridade RAEOA, Arsénio Paixão Bano. Imajen TATOLI/Francisco Sony

DILI, 10 setembru 2021 (TATOLI)Rejiaun Administrativa Espesiál Oé-cusse Ambeno (RAEOA) kontinua tau prioridade ba setór prioritáriu tolu iha proposta Orsamentu Jerál Estadu (OJE) tinan 2022.

“Orsamentu ne’e prioridade ba iha área infraestrutura, edukasaun, no saúde, inklui foku ba instituisaun, katak RAEOA hakarak serví di’ak liu Oé-cusse,” Prezidente Autoridade RAEOA, Arsénio Paixão Bano, hateten, hafoin hamutuk ho ekipa halo aprezentasaun orsamentu 2022 RAEOA iha reuniaun Komité Revizaun Orsamentu Polítika (KROP), ne’ebé realiza iha Ministériu Finansa, Aitarak-laran, sesta ne’e.

Tetu OJE 2022 RAEOA hamutuk $84.436.784, ne’ebé fahe ba kategoria saláriu no vensimentu $11.086.859, bens no servisu $21.361.440, transferénsia públika $4.322.027, kapitál minor $607.155 no kapitál dezenvolvimentu $47.059.303.

Tuir Prezidente Autoridade RAEOA, iha OJE 2021 fó ona prioridade ba setór tolu ne’e, nune’e iha tinan 2022 mós kontinua tanba autoridade hakarak serví povu ho  di’ak ho programa sira.

“RAEOA laiha proposta adisionál, maibé husu de’it responsabilidade hamutuk ba orsamentu, tanba tetu orsamentu ne’ebé Governu sentrál fó ba tinan 2022 hamutuk millaun $84,” nia subliña.

Enkuantu, ezekusaun OJE 2021 RAEOA atinje ona 14%, ne’ebé ho kategoria kiik tanba hahú ezekuta orsamentu tarde iha fulan-marsu tanba foin integra ba iha sistema free balance.

OJE 2021 ba RAEOA hamutuk millaun $127, kompostu hosi saláriu no vensimentu millaun $11,1, bens no servisu millaun $23,8, transferénsia públika millaun $4,3, kapitál minór millaun $2,4 no kapitál dezenvolvimentu millaun $85,5.

Reseita hosi RAEOA hamutuk millaun $207,4, ne’ebé millaun $29,2 transfere hosi Administrasaun Governu Sentrál, millaun $0,8 ba reseita tributária (taxa), millaun $ 177,4 saldo jerénsia, millaun $97,0 hodi finánsia despeza no millaun $80,4 la utiliza ba despeza 2021.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here