Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen Tatoli/Egas Cristovão.

DILI, 10 setembru 2021 (TATOLI)–Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo fó orientasaun ba autoridade lokál sira atu enkoraja komunidade Aileu simu vasina tanba persentajen vasinasaun nível munisipál menus liu.

Nia dehan, alvu Governu nian ema 31.235 tenke simu vasina iha Aileu maibé ema-ne’ebé vasina ona hamutuk (vasinadu) 12.808 kompostu doze dahuluk 8.407 (27%) no doze daruak 4.401 (14%).

Notísia Relevante: Rezultadu vasinasaun iha Aileu persentajen kiik liu munisípiu seluk

“Ita hakarak Aileu nia persentajen tenke sa’e, atu nune’e hamosu imunidade munisipál. Persentajen hosi Aileu nian ne’e kiik-liu kompara ho Manatuto 53%. Ha’u hein katak ho avaliasaun ne’ebé ohin ita halo, nune’e realiza ita-nia mehi to’o dezembru mínimu 80% populasaun Aileu hetan vasina hotu ona. Tanba ne’e, autoridade lokál sira tenke serbisu hamutuk ho ekipa saúde enkoraja komunidade simu vasina ne’e,” Ministru Francisco Jerónimo ko’alia asuntu ne’e bainhira lansa kampaña vasinasaun iha suku Aissirimou, Aileu, sesta ne’e.

Nia husu autoridade lokál sira tenke serbisu maka’as, nune’e komunidade hotu bele simu vasina tanba únika vasina mak bele salva-aan hosi surtu ne’e.

Ministru ne’e husu komunidade Aileu lalika fiar informasaun falsu (hoax) maibé fiar de’it informasaun sientífiku sira ne’ebé fó sai hosi Governu.

“Dalaruma ita lee barak liu iha facebook, ita la lee fali sasán sira sientífiku ne’e, entaun facebook mai ho hanoin oioin, entaun halo ita sai dúvida hotu. Loos duni, iha ema balun sei dúvida, iha ema balun ko’alia iha oin lakohi vasina maibé iha kotuk hakarak. Iha ema balun mai dehan hanesan ne’e, imi vasina ne’e tinan rua tán imi mate ona. Ne’e liafuan falsu atu mai impede progresu vasina no impede ema-ne’ebé hakarak moris iha saúde saudavel,” nia dehan.

Governu sei kontinua esforsu tanba hakarak proteje ninia sidadaun sira no Governu laiha intensaun halo sidadaun sira sai diuk no laiha intensaun atu vasina sidadaun sira mate.

“Se ita ko’alia dehan vasina sidadaun sira sai mate hotu entaun ita-nia líder sira-ne’ebé vasina dala-rua mós sei mate hotu,” nia dehan.

Sekretáriu Administrasaun Munisípiu Aileu, Felix de Oliveira, hateten evaluasaun ne’e importante tebes tanba ne’e nível munisipál sei kontinua diskute hodi enkoraja komunidade sira simu vasina.

“Ita bele halo observasaun katak iha Aileu iha ekipa hotu halo serbisu maka’as tanba ita la tama iha serka sanitária no konfinamentu obrigatóriu, maibé la signifika katak iha laiha problema. Ekipa saúde sira tenke halo serbisu maka’as liután,” nia dehan.

Sekretáriu Administrasaun Munisípiu Aileu ne’e fó orientasaun ba administradór postu administrativu no xefe suku sira tenke enkoraja komunidade sira simu vasina.

Iha biban ne’e, autoridade lokál sira kompromete sei serbisu hamutuk ho ekipa saúde nune’e ema hotu bele simu vasina maibé Governu tenke aselera subsídiu liña frente ne’e.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here