Diretora Nasionál Instituto Nasionál Dezenvolvimentu Mão de obra (INDMO), Isabel Fernandes de Lima. Imagén TATOLI/Antónia Gusmão.

DILI10 setembru 2021 (TATOLI)—Institutu Nasionál Dezenvolvimentu Mão de Obra (INDMO) segunda ne’e fó formasaun kona-bá “Dezeña padraun kompeténsia no rekursu aprendizajen no avaliasaun” ba formadór no konsultór hosi sentru formasaun 29.

“Ami fó formasaun ne’e atu kapasita ita-nia jerente no instrutór sira atu hatene di’ak liután kompeténsia ne’e no rekursu aprendijazen. Tanba, se sira kuandu di’ak entaun sentru ne’e bele prodús ema-ne’ebé ho kualidade tuir padraun ne’ebé mak INDMO ezije,” Diretora Nasionál Institutu Nasionál Dezenvolvimentu Mão de Obra (INDMO), Isabel Fernandes de Lima, hateten ba Agência Tatoli, iha nia knaar-fatin, sesta ne’e.

Hosi formasaun ne’e sira tenke prontu atu hatene kona-bá dezeña padraun kompeténsia, saida mak analiza kompeténsia no saida mak rekursu aprendizajen.

Partisipante ba formasaun ne’e ema 29 ne’ebé kompostu hosi partisipanta na’in-16 tuir formasaun prezensiál no partisipante na’in-12 tuir liuhosi virtual (online) tanba númeru ne’e boot.

“Partisipante 20-resin ne’e mai hosi sentru ne’ebé rejista no akredita hosi INDMO, ne’ebé eziste iha Dili no munisípiu,” nia informa.

Koordenadór Sentru Quesadhip Ruak (CQR), Mardoqueu Soares, sente kontente bele tuir formasaun ne’ebé oferese hosi INDMO, tanba ida-ne’e hanesan pasu pozitivu ida atu dezenvolve di’ak liután sentru formasaun ne’e ba futuru.

“Hosi formasaun ne’e, hakarak ka lakohi, sentru formasaun hotu-hotu tenke implementa tuir padraun INDMO nian. Ne’ebé ami sei esforsu, mezmu ne’e defísil, ami sei implemeta iha sentru formasaun,” nia dehan.

Totál formadór no instrutór ne’ebé tuir formasaun ne’e hamutuk 29, kompostu hosi Eiros Entrepreneur Institute (EEI), Sentru Treinamentu Vokasionál Juventude (STVJ) Camea, Sentru Treinamentu Vokasionál Juventude (STVJ) Comoro, Sentru Treinamentu Vokasionál Juventude (STVJ) Bairru Pité, Sentru Treinamentu Vokasionál Juventude (STVJ) Gleno, Sentru Formasaun Tibar, East Timor Development Agency (ETDA), Centro Formação Profisionál Don Bosco Comoro (CFP-DBC), Sentru Quesadhip Ruak (CQR) no Vizaun Fo’in Sa’e Baucau.

Entretantu, formasaun kona-bá “Dezeña padraun kompeténsia rekursu aprendizajen no avaliasaun” durante loron lima (5), hahú iha segunda no INDMO ensera formasaun ne’e iha sesta (10/09) ne’e.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here