Vise Prezidente Komisaun B Parlamentu Nasionál (PN), ne’ebé trata asuntu Defeza no Seguransa, Cornélio da Conceição Gama ‘L7’, observa direta edifísiu Polísia Tránzitu iha Caicoli, sesta (10/09/21). Imajen Tatoli/Nelson de Sousa.

DILI, 10 setembru (TATOLI)—Vise Prezidente Komisaun B Parlamentu Nasionál (PN), ne’ebé trata asuntu Defeza no Seguransa, Cornélio da Conceição Gama ‘L7’, konsidera edifísiu Polísia Tránzitu iha Caicoli, presiza hadi’a, tanba kondisaun la di’ak ona.

“Hau mai partikulár aproveita atu haree fatin serbisu membru-sira nian, nune’e aprezenta ba Komisaun hodi husu Governu tau atensaun,” Cornélio da Conceição Gama ‘L7’, hateten ba jornalista-sira iha komandu PNTL, Caicoli, sesta ne’e.

Notísia relevante:Agostu, Polísia Tránzitu nasionál rekolla $39.279

Iha observasaun haree katak, haris-fatin la di’ak, fatin ba membru-sira atu utiliza ba serbisu administrasaun no atendimentu públiku kondisaun la di’ak, inklui presija armáriu no kadeira.

Edifísiu ne’e ne’e konstrui desde tempu okupasaun Indonézia, to’o agora seidauk halo rehabilitasaun no inundasaun iha 04 abríl bee tama.

L7 sei aprezenta ba Komisaun hodi hato’o ba Governu atu hadi’a tanba serbisu Tránzitu mós importante, ne’ebé durante ne’e rekolla reseita makás ba Estadu.

Tuir dadus, iha agostu tinan ne’e, Departamentu Tránzitu Rodoviáriu Nasionál, rekolla reseita $39. 279, ba kofre Estadu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here