Motorizada Yamahan XTZ 10 ne’ebé Ministériu Administrasaun Estatál distribui ba ekupa PNDS RAEOA. Imajen/Mída PNDS.

OÉ-CUSSE, 10 setembru 2021 (TATOLI)—Governu liuhosi Ministériu Administrasaun Estatál (MAE) distribui motorizada Yamaha XTZ 150, unidade 17 ba ekipa Programa Nasionál Dezenvolvimentu Suku (PNDS) iha Rejiaun Administrativa Espesiál Oé-Cusse Ambeno.

“Governu sentrál distribui motorizada ba ekipa PNDS Oé-Cusse ninian ne’e, importante tebes atu ajuda sira hodi lori-hala’o servisu iha área remota,” Sekretáriu Rejionál Asuntu Administrasaun Estatal RAEOA, Martinho Abani Elu, informa ba Agência Tatoli, via telefonika, sesta ne’e.

Nia husu ba ekipa PNDS RAEOA atu uza motorizada ne’e ho sentimentu patriotizmu no nasionalizmu katak, sasán Estadu nian hodi fasilita sira-nia servisu, tanba maioria ekipa PNDS servisu ativa liu iha suku no aldeia sira iha área remota.

“Ha’u observa ekipa PNDS servisu maka’as tebes. Maske iha loron feriadu, sira servisu nafatin. Tanba ne’e, fasilidade hirak ne’e merese duni atu fó ba ekipa PNDS, nune’e mellora di’ak liután servisu iha terrenu,” nia dehan.

Diretór PNDS RAEOA, Sebastiao Tanesi, hato’o agradesimentu ba Governu sentrál liuhosi MAE tanba oferese motorizada unidade 17 ba PNDS Oé-Cusse, ho objetivu atu apoia fasilitadór PNDS sira hodi fó asisténsia téknika iha terrenu.

Atu aselera programa PNDS Regular Reziliénsia Komunitáriu no Rekuperasaun Ekonomia (RKRE), Uma Kbiit Laek (UKL) no Rehabilitasaun Sede Suku (RSS) ho lalais, entaun prezisa fasilidade transporte hanesan motorizada no karreta.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here