Forsa Naval EUA hahú konstrusaun sala aula Eskola Ensinu Sekundáriu númeru 2 Villa nova Baucau, sesta (10/09). Imajen TATOLI/Natalino Belo

BAUCAU, 10 setembru 2021 (TATOLI)–Adjuntu Diretór Eskola Ensinu Sekundáriu númeru 02 Villa nova Baucau, Titos Almeida, hateten, Forsa Navál Estadu Unidu Amerika (EUA) hahú ona konstrusaun sala aula haat ho totál orsamentu $350.000 ne’ebé tuir planu sei finaliza tinan ne’e nia rohan.

Adjuntu Diretór Eskola Ensinu Sekundáriu númeru 02 Villa nova Baucau, Titos Almeida. Imajen TATOLI/Natalino Belo

“Sira hahú ona no ohin dadeer cor ona semente fondasi, tuir planu sei finaliza iha fulan-tolu nia laran maibé tanba situasaun COVID-19 ita la hatene, maibé tuir informasaun ne’ebé sira hato’o, dezembru sira finaliza ona,” Adjuntu Diretór hateten iha ninia knar fatin, Villa nova, sesta ne’e.

Iha forsa hamutuk na’in-22, kompostu hosi feto tolu no mane 13 mak envolve iha kontrusaun ne’e, ne’ebé hahú mobiliza ekipamentu ba fatin konstrusaun iha semana tolu liubá kotuk.

Tuir Adjuntu Diretór, maski aumenta ona sala aula haat, maibé seidauk sufisiente tanba estudante iha eskola ne’e hamutuk 1.003, kompostu hosi primeiru to’o terseiru ano utiliza de’it sala 20.

“Daudaun ne’e iha de’it sala 20, entaun fahe ba turnu lorokraik no dadeer, tanba kondiz mós tuir regraa saúde kauza COVID-19, entaun sala ida fahe ba estudante na’in-15. Atu estudante sira tama hotu dadeer, presiza sala aula 80,” nia akresenta.

Antes ne’e, iha tinan 2019 Forsa Navál EUA deretamente observa kondisaun Ensinu Sekundáriu númeru 2 no deside atu konstrui eskola liuhosi Embaixada EUA iha Timor-Leste.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here