Dirasaun Rejionál Asuntu Agrikultura liuhosi Departementu Floresta, daudaun ne’e prepara ona ai-oan hamutuk rihun 50 atu kuda iha área protejida. Imajen TATOLI/Abílio Elo Nini.

OÉ-CUSSE, 10 setembru 2021 (TATOLI)—Dirasaun Rejionál Asuntu Agrikultura liuhosi Departementu Floresta, daudaun ne’e prepara ona ai-oan rihun 50 atu kuda iha área protejida ba bee-metan hamutuk 58 iha teritóriu Rejiaun Administrativa Espesiál Oé-Cusse Ambeno (RAEOA).

Notísia Relevante: Asegura debitu bee-moos, Autoridade RAEOA konserva bee-matan 58

Diretór Dirasaun Agrikultura RAEOA, Serilio dos Remedios Baba. Imajen TATOLI/Abílio Elo Nini.

“Ami prepara ona plantasaun ai-oan atu konserva bee-matan sira-ne’ebé autoridade RAEOA identifika halo konservasaun liuhosi programa food for work, Dirasaun agrikultura daudaun ne’e prepara ai-oan hamutuk rihun 50 iha sentru viveru rejionál ninian,”  Diretór Dirasaun Agrikultura RAEOA, Serilio dos Remedios Baba, informa ba Agência Tatoli iha Horta, Oé-Cusse, sesta ne’e.

Objetivu kuda ai-oan sira-ne’e atu fó embairumentu di’ak ba konservasaun bee-moos nian ba kualidade debitu bee-moos.

Ai-oan sira-ne’ebé prepara mak hanesan Ai-Mahoni, Au, Kulu, Ai-Kami, Ai-Nitas, Ai-Cacau, Café, Du’ut Betyberegres, Ai-Nimba, Ai-Hali Portu, Ai-Cameli, Ai-Figos, inklui plantasaun lokál sira-ne’ebé ejiste iha bee-matan sira baibain komunidade sira uza iha foho tanba fó debitu kualidade ba bee-matan sira iha tempu bailoron naruk.

Planu alokasaun ba fatin konservasaun sira-ne’e sei hahú iha fulan novembru 2021, tanba daudaun ne’e servisu Dirasaun Agrikultura koopera hamutuk ho parseriu ONG lokál sira hanesan World Neighbor (WN), Asosiasaun Haburas Kapasidade Agrikultura no Ekonómia (AHCAE), Centru Educação Sívica Enclave Oé-cusse (CECEO), Binibu Faef Nome (BIFANO) hamutuk ho viverista sira prepara ona, grupu agrikultura sira iha baze ne’ebé durante ne’e apoiu halo servisu voluntariomente ba bee-matan sira-ne’e liuhosi programa food for work.

Tuir dadus Autoridade RAEOA liuhosi Sekretáriu Rejionál Asuntu Agrikultura iha tinan ne’e konsege identifika bee-matan hamutuk 58 atu halo konservasaun, tanba iha tinan kotuk akontese krize bee-moos iha Oé-Cusse.

Bee-matan sira-ne’e partensia ba sub-rejiaun haat ho totál área konservasaun hamutuk ektare 100.99, kobre uma kain 3,735 ne’ebé kompostu hosi aldeia 32 no suku 14.

Jornalista : Abílio Elo Nini

Editr         : Cancio Ximenes

HAKEREK NO HATÁN

Please enter your comment!
Please enter your name here