Diretór Ezekutivu Centro Nacionál Chega (CNC-Sigla Portugués), Hugo Maria Fernandes. Imajen Tatoli/Francisco Sony

DILI, 10 setembru 2021 (TATOLI)- Diretór Ezekutivu Centro Nacional Chega, Institutu Públiku (CNC, I.P), Hugo Maria Fernandes informa, liuhosi reuniaun no aprezenta proposta ba Komité Revizaun Orsamentu Polítiku (KROP) kona-ba tetu Orsamentu Jerál Estadu 2022, CNC husu adisionál hamutuk $381,108.

“CNC husu KROP ho montante $381,108 tanba antes ne’e CNC simu pakote fiskál hosi Ministériu Finansa ho Unidade Nasionál Planeamentu Monitorizasaun no Avaliasaun (UPMA), loloos Pakote Fiskál ba CNC ne’e hamutuk $2,456,571, maibé pakote ne’e ami halo ezersísiu ba programa sira iha duni redusaun la to’o, entaun Centro Chega husu tan $381,108  hodi kompleta ba Orsamentu Centro Chega ba 2022 ne’e hamutuk $2,837,679, maibé ida-ne’e ita foin aprezenta, seidauk hatene KROP aprova ka lae,” Hugo Maria Fernandes hateten ba Agência Tatoli liuhosi telefónika, sesta ne’e.

Nia informa, hosi orsamentu ne’ebé CNC husu ne’e ba programa boot tolu hanesan, Patrimóniu Kulturál, Igualdade Jéneru Inkluzaun Sosiál, no Governasaun ho Jestaun Institusionál, entaun Patrimóniu Kulturál, ne’e sei foku ba kontinua asuntu ne’ebé relasaun ba edukasaun formasaun, peskiza sira ezaminasaun dezenvolvimentu arkivu no muzeu.

“Igualdade Jéneru Inkluzaun Sosiál ne’e, ita ko’alia kona-ba atu hala’o atividade sira ne’ebé mak tama ba programa reparasaun ba sobrevivente vítima sira, no ikus mak boa governasaun no jestaun institusionál ne’e ko’alia kona-ba planeamentu, servisu auditoria interna, jurídika,  formasaun ba funsionáriu sistema sira servisu nian, aprovizionamentu no ida tan mak parseria no advokasia,” Hugo Fernandes esplika.

Tuir kategoria kompozisaun orsamentál OJE 2022, ne’e ba kategoria hanesan Kapitál dezenvolvimentu hamutuk $561,710, porsentu 23, transferénsia públika 783,011 ho nia porsentu 28, saláriu vensimentu $683,320 ho nia porsentu 24, bens servisu $809,638 ho nia porsentu 32, no Kapitál Menór laiha (-).

Jornalista : Arminda Fonseca

Editór : Francisco Simões

HAKEREK NO HATÁN

Please enter your comment!
Please enter your name here