Prezidente Konsellu Veteranu, Vidal de Jesus "Riak Leman". Imajen TATOLI/Arminda Fonseca.

DILI, 10 setembru 2021 (TATOLI)—Prezidente Konsellu Veteranu, Vidal de Jesus ‘Riak Leman’ informa, aban (sábadu, 11/09) Ministériu Asuntu Kombatente Libertasaun Nasionál (MAKLN) hamutuk ho Konsellu Veteranu sei inagura uma Veteranu Rai Lakan iha Metinaro.

Notísia Relevante: MAKLN sei aloka osan $2,400,000 konstrui uma 60 ba veteranu

“Aban, Konsellu Veteranu ho MAKLN sei inaugura Veteranu Rai Lakan nia uma foun ne’ebé konstrui iha Metinaro ne’ebé mak Governu apoiu ho osan rihun $40 ba kada veteranu ida,” Riak Leman hateten ba Agência TATOLI, iha nia knaar fatin Vila Verde, Dili, sesta ne’e.

Osan ne’ebé Governu fó apoiu ne’e, veteranu sira tenke konstrui uma nune’e hatama relatóriu ba Governu katak sira uza osan ne’e ba halo uma, tanba ho inaugurasaun uma veteranu nian aban ne’e hamutuk uma veterau na’in tolu mak konsege finaliza ona konstrusaun.

“Veteranu sira ne’e uma finaliza ka hotu lalais ne’e tanba sira na’in ida-idak selu badaen mak halo sira-nia uma. Maibé fiar katak tempu badak veteranu seluk mós bele konklui hotu no hatama relatóriu konstrusaun uma nian,” nia dehan.

Prezidente Konsellu Veteranu hateten, tuir loloos konstrusaun uma veteranu finaliza kleur ona maibé tanba situasaun pandemia COVID-19 no Governu aplika serka sanitaria no konfinamentu domisiliáriu entaun konstrusaun ne’e atraza.

“Ida-ne’e prejudika ita-nia veteranu sira-nia movimentasaun hodi sosa materiál no mós aumenta tan udan hamosu inundasaun nune’e buat hotu labele la’o,” Riak Leman hateten.

Antes ne’e, Konsellu Veteranu ho MAKLN inagura ona veteranu saudozu “Mau Tino” iha Manufahi-Same no veteranu Afonso “Malibuti” iha Metinaro, Munisípiu Dili.

Notísia Relevante: Governu inaugura ona uma veteranu saudozu ‘Mau Tino’ iha Same

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here