Prezidente Parlamentu Nasionál, Deputadu Aniceto Longuinhos Guterres Lopes, hasoru malu ho Prezidente Uniaun Interparlamentár (IPU-sigla inglés), Duarte Pacheco, iha Aústria. Imajen/Mídia PN.

DILI, 09 setembru 2021 (TATOLI)–Prezidente Parlamentu Nasionál, Deputadu Aniceto Longuinhos Guterres Lopes, informa Prezidente Uniaun Interparlamentár (IPU-sigla inglés), Duarte Pacheco katak Timor-Leste sei hametin liután diplomasia parlamentár hodi promove valór demokrasia.

Notísia Relevante: Aniceto Guterres-Puan Maharani diskute futuru kooperasaun iha Áustria

“Ha’u konvida Prezidente IPU Duarte Pacheco atu halo vizita mai Parlamentu Nasionál Timor-Leste. Hanesan membru IPU, Timor-Leste sei mantein no kria ligasaun di’ak hodi hametin diplomasia parlamentár,” Prezidente Parlamentu Nasionál, Deputadu Aniceto Longuinhos Guterres Lopes ko’alia asuntu ne’e bainhira hasoru malu ho Prezidente IPU, Duarte Pacecho iha sidade Viena, Áustria, kinta ne’e.

Tuir komunikadu imprensa ne’ebé Agência TATOLI asesu hosi delegasaun parlamentu Timor-Leste nian hosi Áustria ne’e haktuir,  Prezidente Aniceto Guterres agradese ba prezidente IPU tanba bele hasoru malu ho delegasaun parlamentu Timor-Leste nian.

Nia informa ba Pacheco katak, Estadu Timor-Leste sei hamutuk ho komunidade internasionál hodi kombate COVID-19 ne’ebé domina ona mundu tomak.

Iha opurtunidade ne’e, Prezidente IPU agradese ba Timor-Leste tanba hola parte ona iha konferénsia mundiál dalima ne’e.

Prezidente IPU, Duarte Pacheco, hateten iha fulan-marsu tinan 2022 sei iha mós reuniaun IPU nian iha Bali, Indonézia.

Nia fó hanoin ba Prezidente Parlamentu Nasionál Timor-Leste katak, Timor-Leste mós tenke kandidata ema ba komisaun direitu umanu IPU nian.

Iha parte seluk, Prezidente IPU Duarte Pacheco husu Timor-Leste atu organiza didi’ak reuniaun simeira asembleia CPLP ne’ebé sei marsu 2022, tanba Timor-Leste nu’udar uma-na’in ba simeira ne’e.

Prezidente IPU, Duarte Pacheco, promete sei hola parte iha simeira CPLP ne’ebé organiza iha Timor-Leste ne’e.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here