Osan Dollar Amerikanu. Imajen/Espesiál

DILI, 09 setembru 2021 (TATOLI)—Diretór Dirasaun Nasionál Jestaun Finansa Públika, Ministériu Solidariedade Sosiál no Inkluzaun (MSSI), Jemmy Valente dos Reis informa ezekusaun Orsamentu Jerál Estadu (OJE) 2021 hosi janeiru to’o setembru MSSI ezekuta ona 49,8%.

Notísia Relevante: OJE 2021: trimestre daruak MSSI foin ezekuta 12.1%

“To’o ohin loron, ezekusaun ba Orsamentu Jerál Estadu 2021, MSSI ezekuta ona 49,8% hoso totál $941,737.42 ne’e fahe ba saláriu vensimentu 60.1%, ho osan $1,065.056,03; bens servisu 33.3% ho osan millaun $69; kapitál minór 29.4% ho osan $212.125; kapitál dezenvolvimentu 0% no tranferénsia públika 70.4% ho osan $6,655.042,92,” Jemmy Valente dos Reis ba Agência TATOLI, iha nia knaar fatin, Caicoli, Dili, kinta ne’e.

Kona-ba kapitál dezenvolvimentu, nia dehan, ida-ne’e nia kompromisu no prosesu hotu halo tiha ona maibé seidauk tama ba ezekusaun real, tanba ne’e nia ezekusaun sei zero hela, no kapitál dezenvolvimentu nia osan ne’ebé mak MSSI aloka $2.016,000.

“Hosi osan $2.016,000 ne’e ita atu konstrui edifísiu Sentru Solidariedade Sosiál (CSS-sigla portugés) nian iha Munisípiu Aileu, Ainaro, Liquiçá no Munisípiu Viqueque. Ida-ne’e prioridade ba MSSI nian ba tinan ne’e, nune’e iha Aileu no Liquiçá mak tama ona prosesu inisia publika ba públiku kona-ba konstrusaun,” nia dehan.

Hosi ezekusaun sira-ne’e hotu, liga ba programa sira iha ualu (8) no nia sub-programa iha 17 no atividade kuaze 50-resin, maibé programa sira-ne’e kuaze lala’o tanba Timor-Leste enfrenta hela pandemia COVID-19.

MSSI nia programa ne’ebé mak labele hala’o iha pandemia COVID-19 ne’e mak programa protesaun ba labarik hosi Komisaun Nasionál Direitu Labarik (KNDL) ne’ebé seidauk halo sensibilizasaun, no ninia ezekusaun zero hela no mós ba sensibilizasaun prevensaun ba eskola sira mak HIV/SIDA.

“Sensibilizsaun ba programa rua ne’e ba entidade relevante sira ne’ebé mal iha servisu ligasaun ho programa rua ne’e, MSSI seidauk hala’o tanba pandemia COVID-19,” nia informa.

Maibé ho pandemia COVID-19 ne’e, MSSI sei esforsu hodi aselera programa prioridade sira no fiar katak to’o tinan ne’e nia rohan, MSSI bele ezekuta 80%, tanba atu ezekuta to’o 100% ne’e imposível tanba Timor-Leste iha hela situasaun COVID-19.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here