Xefe Sentru Saúde Uailili, Adelino Moreira de Espírito Santo. Imajen TATOLI/Natalino Belo

BAUCAU, 09 setembru 2021 (TATOLI)–Xefe Sentru Saúde Uailili, Adelino Moreira de Espírito Santo, hateten, kazu má-nutrisaun iha Uailili daudaun ne’e ho kategoria moderadu, ne’ebé entre 5% to’o 8% hosi labarik 100 mai karaik.

“Bainhira liu númeru ne’e ita konsidera ameasa ba ita. Tanba ne’e, sistema ai-han presiza halo koresaun iha setór barak no presiza hili setór prioridade ba Timor-Leste rasik hanesan agríkola tenki tama ba indústria, tanba hahán mak bele rezolve ema-nia saúde, inklui evita ema moras, mate no redús má-nutrisaun,” Xefe Sentru Saúde Ualili, hateten iha salaun Apuramentu Administrasaun Baucau, Villa nova, kinta ne’e.

Tuir Adelino, bainhira setór agrikultura laiha sustentabilidade hahán, bele fó impaktu ba saúde tanba ema má-nutrisaun a’as no hamlaha barak.

“Ita rekomenda hahán ne’ebé nutritivu hanesan ai-han hosi animál na’an, ai-fuan to’o modo tahan ne’ebé iha nutrisaun, Tanba ne’e presiza hasa’e produsaun se lae impaktu mak má-nutrisaun tanba ita konsume hahán karboidratu mak barak liu do que hahán nutritivu,” nia akresenta.

Parte saúde durante ne’e halo prevensaun atu labele tama ba kategoria grave, liuliu ba labarik menus hosi idade 5 ba kraik no inan isin-rua.

“Ita konsidera tanba hahán kuran, la hatene sira mak la konsume variável ou sira rasik laiha hahán,” nia hatutan.

Métodu prevenesaun ba má-nutrisaun mak edukasaun, hanesan konsolidasaun ba inan-aman, fahe informasaun liga ba hahán ne’ebé komunidade konsume, halo tratamentu simples, no hetan apoiu hosi ajénsia balun hodi fahe hahán nutritivu ba labarik sira.

Tuir rezultadu peskiza hosi CARE International, ne’ebé hala’o iha munisípiu Ainaro, Ermera, Liquiçá no Manatuto, kuaze labarik 90% seidauk asesu ba hahaán nutrisaun di’ak.

Tuir dadus demográfiku no peskiza saúde 2016, kuaze labarik na’in-ida hosi na’in-haat (24%) menus hosi tinan 5 sofre má-nutrisaun, enkuantu labarik 6% liu pezu.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here