Inspetór Jerál Traballu, Rofino Lopes dos Reis. Imajen TATOLI/Antónia Gusmão

DILI, 09 setembru 2021 (TATOLI)—Inspesaun Jerál Estadu (IGT, sigla portugés) husu adisionál $130.000 hodi kompleta estrutura no mellora servisu iha tinan oin.

“Ami-nia tetu fiskál $432.932 no ami husu adisionál hodi kompleta estrutura, tanba daudaun ne’e IGT só iha de’it  inspetór jerál de’it, seidauk iha kargu xefia sira. Seluk ne’e ligasaun ho manutesaun ba veíkulu sira ne’ebé iha,” Inspetór Jerál Traballu, Rofino Lopes, informa ba Agência TATOLI, iha Ministériu Finansa Aitarak-laran, kinta ne’e.

Notísia relevante: IGT rejista kompañia taka atividade ekonómika 108 durante pandemia

Inspetór Jerál iha esperansa ba Komite Revizaun Orsamentu Polítika (KROP) bele konsidera proposta propoin ba tinan oin.

“Ami aprezenta hela ami-nia orsamentu tinan ne’e no tinan oin, kuaze ko’a $60.000, ami hanoin kuandu ko’a entaun afeta tebes ba ami-nia atividade inspesaun sira,” nia akresenta.

IGT hanesan servisu públiku ida, ne’ebé iha dependénsia direta ba membru Governu responsável ba área traballu, ne’ebé halo kontrolu ba norma kondisaun traballu, halo prevensaun risku profisionál, seguransa sosiál, kolokasaun, empregu no protesaun dezempregu, traballu estranjeiru, hanesan norma kontrolu hosi lei ne’ebé atribui ba Inspesaun Jerál.

Área atuasaun IGT mak iha lokál traballu sira hodi haree prosesamentu infrasaun traballu no seguransa sosiál, kontrolu ba planu konstrusaun, transformasaun no modernizasaun estabelesimentu, realizasaun inkéritu asidente traballu no moras grave no mate hosi profisionál sira, no seluk tan liga ho ambiente traballu.

IGT rejista ona kompañia 108 mak taka atividade ekonómika no traballadór lakon serbisu hamutuk 771 tanba situasaun pandemia, hahú tinan 2020 to’o 2021.

Aleinde ne’e, durante halo servisu iha tinan 2020, konsege hatama reseita $273.754, ne’ebé maioria mai hosi multa no auto adverténsia ne’ebé aplika ba kompañia komete infrasaun hamutuk 400 resin.

Iha tinan 2020, IGT halo atividade inspesaun 1.200 no iha atividade ne’e rasik deteta traballadór hamutuk 18.590 maka serbisu iha kompañia.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here