Ministériu Transporte Komunikasaun (MTK) hamutuk ho Polísia Tránzitu, halo konferénsia imprensa kona-ba regra reativasaun transporte públiku sira, iha salaun MTK, kinta (09/09). Imajen TATOLI/Francisco Sony

DILI, 09 setembru 2021 (TATOLI)–Governu liuhosi Ministériu Transporte no Komunikasaun  (MTK) autoriza hikas movimentu transporte públiku iha Dili laran no bá munisípiu seluk, ho prova kartaun kinur ne’ebé hatudu vasina kompleta kontra COVID-19.

Diretór Jerál MTK, Gaspar de Araújo. Imajen TATOLI/Francisco Sony

“Reativa movimentu transporte públiku  ne’e rasik ba mikrolete, taxi inklui bis sira hodi lori pasajeiru hosi munisípiu mai Dili no Dili bá munisípiu, maibé tenke kompleta vasina doze daruak. Ema ne’ebé maka sona dala-rua ona tenke hatudu kartaun kinur mak bele tama no sai, tantu kondutór no pasajeiru,” Diretór Jerál MTK, Gaspar de Araújo, hateten, liuhosi konferénsia imprensa iha salaun MTK, Caicoli, kinta ne’e.

Notísia relevante: Hahú aban, Governu hakotu konfinamentu domisiliáriu iha Dili

Nune’e, nia husu ba kondutór transporte públiku ne’ebé maka dokumentu mate, bele halo renovasaun iha Diresaun Nasionál Transporte no Komunikasaun.

Diretór ne’e mós husu atu transporte públiku sira nafatin kumpre protokolu saúde durante sirkula tula pasajeiru, hanesan uza máskara taka ibun no inus, fase liman beibeik, no halo distánsiamentu entre ema ida ho ema seluk.

“Kondutór bis no mikrolet tenke hatene no komprende regra, labele tula pasajeiru liu kapasidade karreta. Atu tula pasajeiru hira ami la sita, maibé kondutór sira maka tenke hatene no komprende labele tula pasajeiru  barak nune’e prevene kontájiu COVID-19,” nia akresenta.

Xefe Departementu Trans Seguransa Rodoviária Nasionál hosi Komandu Jerál PNTL, Inspetór Xefe Polísia Inocêncio Freitas. Imajen TATOLI/Francisco Sony

Iha sorin seluk, Xefe Departementu Trans Seguransa Rodoviária Nasionál hosi Komandu Jerál Polísia Nasionál Timor-Leste (PNTL), Inspetór Xefe Polísia  Inocêncio Freitas, hateten,  parte PNTL sei halo kordenasaun ho Sentru Integradu Jestaun krize (CIGC, sigla portugés) atu define kuantidade tula ema iha transporte públiku.

Ba kestaun ne’e, nia parte sei koordena ho membru PNTL ne’ebé koloka iha pontu entrada sira, atu haree dokumentu karreta inklui dokumentu seluk.

“Tanba lei dehan ona,  sira ne’ebé autoriza atu sai tenke sona dala-rua, ne’ebé husu ba hotu-hotu atu kumpre regra sira ne’e, atu nune’e moras labele hadaet ba ema barak,” Inspetór Xefe Polísia ne’e dehan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here