Diálogu sub-nasionál kona-ba sistema ai-han iha Timor-Leste, iha salaun apuramentu Administrasaun Villa nova, Baucau, kinta (09/09). Imajen TATOLI/Natalino Belo

BAUCAU, 09 setembru 2021 (TATOLI)–Gabinete Apoia Sosiedade Sivil (GASC, sigla portugés) hosi Gabinete Primeiru-Ministru (GPM) realiza diálogu sub-nasionál kona-ba sistema ai-han iha Timor-Leste, ho objetivu atu identifika problema no ikus mai fó solusaun.

Ofisiál Multi Setorál Administrasaun, Nutrisaun no Planeamentu GASC, Josh Hernandes. Imajen TATOLI/Natalino Belo

Ofisiál Multi Setorál Administrasaun, Nutrisaun no Planeamentu GASC, Josh Hernandes, hateten, objetivu hosi diálogu ne’e atu kompleta preparasaun Timor-Leste hanesan halibur informasaun no prodús relatóriu, hodi partisipa iha simeira internasionál kona-ba sistema ai-han iha Nova Iorke ne’ebé sei realiza iha loron 23 setembru.

“Maioria ita identifika, hosi munisípiu sira kuaze hanesan, problema ka obstákulu ne’ebé sai hanesan dezafiu boot ba sistema ai-han mak hanesan infraestrutura ne’ebé la apropriadu to’o iha área rurál hodi difikulta prosesu transportasaun ai-han,” Ofisiál ne’e relata iha salaun apuramentu Admistrasaun Baucau, Villa nova, kinta ne’e.

Daudaun ne’e GASC kompleta ona prosesu no preparasaun balun inklui diálogu nasionál iha Dili no sub-nasionál iha munisípiu Bobonaro, Manufahi, Lautém, Manatuto no ohin iha Baucau no ikus iha Viqueque.

Notísia relevante: GASC konsulta prioridade hadi’a sistema ai-han iha TL

Diálogu ne’e, sei foka ba tópiku lima hanesan produsaun, transporte no armazenamentu, orsamentu, distribuisaun no konsume.

Timor-Leste seidauk iha armazenamentu ne’ebé própriu hodi prezerva ai-han no kuñesementu komunidade kona-ba ai-han hosi tradisionál, ne’ebé maioria produsaun hosi agrikultór sira sei uza sistema tradisionál.

“Maioria kuaze hanoin hanesan, katak tenki uza teknolojia avansadu atubele muda sistema ai-han iha Timor-Leste, liuliu liga ba produsaun. Espera instituisaun Governu sira bele tau prioridade, tanba ne’e sujere ona ba planu anuál atu sai asaun integradu ida, nune’e bele rezolve sistema ai-han iha Timor-Leste,” Josh akresenta.

Prioridade sira ne’e hanesan multi setorál, la’ós de’it hosi Ministériu Agrikultura no Peska (MAP) nian, maibé haree mós hosi parte Ministériu Saúde (MS), Ministériu Turizmu, Komérsiu, Industria (MTKI), Ministériu Finansa (MF), Ministériu Obraa Públika (MOP).

“Ita koko identifika de’it ida ne’ebé mak ita sente katak sai hanesan importante liu, ezemplu iha parte saúde, kontinua fó susu-ben inan ba labarik hosi tinan 0 to’o 2 no feto produtiva ou reprodutiva sira kontinua eskola, parte agrikultura nian presiza diversifika ai-han no kontinua promove produtu lokál inklui mós kria lei atu regula presu iha merkadu no vítima ba produsaun,” Ofisiál ne’e esplika.

Iha fatin hanesan, Sekretáriu Administrasaun munisípiu Baucau, Simão dos Santos Marques Pinheiro, hateten, hosi avaliasaun Timor-Leste iha númeru má-nutrisaun ne’ebé boot, tanba ne’e liuhosi diálogu  bele reforsa polítika Governu hodi redús problema ne’e.

“Ita dalabarak liu nunka konsume hahán nutritivu rai-laran, maibé konsume hahán ne’ebé importa hosi rai-li’ur, entaun bele afeta ba saúde, tanba ne’e sujere atu reforsa grupu agrikultór sira hodi hadi’a kualidade no kuantidade, atu nune’e bele kontribui redús má-nutrisaun iha ita-nia nasaun,” Simão dehan.

Diálogu sub-nasionál ne’e partisipa hosi Diretór servisu liña ministeriál Baucau, Administradór postu neen, Sosiedade sivil, Polísia Nasionál Timor-Leste (PNTL), Grupu Agrikultór no Pesoál Saúde.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here