Prezidente Komité masakre Bobo-Ufe, Tumin, Baptista dos Santos Elo. Imajen TATOLI/Evaristo Soares Martins.

DILI, 09 setembru 2021 (TATOLI)–Prezidente Komité Bobo-Ufe, Tumin, Baptista dos Santos Elo, hateten família vítima masakre Bobo-Ufe, Tumin iha Rejiaun Administrativa Epsesiál Oé-Cusse-Ambeno (RAEOA) husu ba Governu atu rekoñese masakre Tumin tanba ema sira-ne’ebé mate ne’e nia isin hodi sosa Liberdade no ukun rasik-aan.

Notísia Relevante: Atoni-oan iha Dili selebra masakre Tumin ho sunu lilin no kari aifunan

“Ohin tinan 22 ona, ami lakon maun, alin, inan no aman. Tinan 22 ne’e hafalun hela ho tristeza iha ami-nia neon, ami sente hakfodak hela de’it. Momentu ne’ebá, balun mate soe hela sira-nia oan no balun sei bebé. Oras ne’e ami harii tiha ona Komité ida maibé husu nafatin ba Estadu atu rekuñese netik masakre Tumin ne’e, tanba sira-nia mate ne’e parte ida ba ita-nia Liberdade,” Prezidente Komité Bobo-Ufe, Tumin, Baptista dos Santos Elo, informa ba jornalista sira, iha Lecidere, kinta ne’e.

Estadu tenke rekuñese hodi hamatan no fó tratamentu ba oan ki’ak sira, karik iha oportunidade ruma bele inklina sira, tanba ko’alia kona-bá justisa ne’e entrega ba Estadu tanba justisa mak liberdade.

“Hosi família vítima la ezjie tán justisa tanba tinan barak ona ita ejize ba justisa. Importante liu mak ita-nia liberadade, pás no hakmatek. Tanba, ita atu hetan ukun-aan tenke sosa ho ruin no raan,” nia dehan.

Saudozu Alberto Afoan nia oan mane, José Bobo, sente triste ho akontesimentu 8-9 setembru 1999 ne’ebé hamosu masakre Tumin, ne’ebé lakon nia aman ho família sira.

Bainhira Alberto Afoan mate, Jose Bobo sei ho idade 12 no husik hela inan-faluk no oan na’in-neen (6) ne’ebé laiha forsa atu sustenta família maibé labele sees hosi realidade ida-ne’e.

Ni haktuir, bainhira rona katak aman mate ona entaun ninia inan laiha kbiit atubele buka serbisu atu sustenta nesesidade família nian iha situasaun defísil ne’e.

Oan Mane hosi saudozu Alberto Afoan, José Bobo. Imajen TATOLI/Evaristo Soares Martins.

“Husu ba Estadu presiza tau-matan ba família vítima masakre Tumin nian, liu-liu ba sira-ne’ebé durante ne’e seidauk tau-matan hosi Estadu tanba ita haree Estadu ne’e tau-matan liu ba família veteranu sira tanba uluk luta iha ai-laran. Maibé masakre sira, hanesan mós, Estadu presiza konsidera,” José Bobo husu.

Estadu presiza tau matan ba família sira-ne’ebé ekonomia fraku, balun la eskola, balun eskola maibé la hotu, balun konsege eskola hotu maibé laiha serbisu ne’e.

“Ida-ne’e mak sai preokupasaun boot ba ami. Ha’u espera ba futuru Estadu bele tau-matan ba família vítima sira hanesan oan ki’ak sira no faluk sira,” sauzou Alberto Afoan nia oan amne ne’e fó hanoin.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here