Médiku espesialista na’in-ualu hosi Austrália ne’ebé sei apoia médiku TL kombate COVID-19, to’o ona Aeroportu Comoro, ho Aviaun Qantas Spirit of Austrália, Kuarta (08/09). Imajen Tatoli/Francisco Sony.

DILI, 09 setembru 2021 (TATOLI)—Ekipa Australian Medical Assistance Teams (AUSMAT), hahú fó apoiu ba ekipa pilár hitu jestaun kazu COVID-19, iha izolamentu Lahane no Vera Cruz, kinta ne’e.

“Ekipa ne’ebé to’o horisehik, ohin integra ona ho ekipa pilar hitu ba jestaun kazu COVID-19  iha sala  izolamentu-sira no sei haree mós  ba munisípiu-sira atu prepara hamutuk rekursu,” Diretora Jerál Prestasaun Serbisu Saúde, Odete da Silva Viegas, hateten ba jornalista-sira iha Ministériu Saúde (MS), Caicoli, kinta ne’e.

Notísia relevante:Médiku na’in-ualu hosi Austrália to’o ona TL

Periúdu serbisu hosi ekipa AUSMAT hahú ohin  to’o kompleta loron 28, no parte Ministériu Saúde espera  katak, sei bele halo buat ruma no husik buat ruma ba profisionál saúde timoroan-sira.

Ekipa médiku ne’e kompostu hosi médiku ne’ebé sei halo atendimentu iha emerjénsia na’in-rua, farmasista na’in-ida, enfermeiru na’in-rua, serbisu lojístika na’in-ida, atende ba kontrolu oksijéniu na’in-ida, no epidemolojia na’in-ida.

Husu populasaun simu vasina

Governu hakotu ona konfinamentu obrigatóriu iha munisípiu Dili, maibé Ministériu Saúde (MS) apela ba  populasaun atu simu vasina.

“Husu ba populasaun iha Dili atu hakbesik-an ba fasilidade saúde hodi simu vasina ba prevensaun COVID-19,” Odete da Silva Viegas apela.

Parte MS husu ne’e tanba tuir dadus hatudu katak, ho vasina bele minimiza risku ba ema hotu tanba kazu ospitalizasaun ne’ebé makás, maioria ema la vasina.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here