Embaixadór Xina iha TL, Xiao Jiaguo oferese máskara rihun-40 ba Governu Timor-Leste (TL), ne’ebé simu direta hosi Vise-Ministru Administrasaun Estatál, Lino de Jesus Torezão iha embaixada Xina, kinta ne’e. Imajen Tatoli/Felicidade Ximenes.

Dili, 08 setembru 2021 (TATOLI)-Embaixada Xina iha Timor-Leste fó doasaun máskara 240,000 no ekipamentu anti-epidémika sira seluk ba Ministériu Saúde Timor-Leste. Ida ne’e lote material anti-epidémika ba dala-13 ne’ebé mak doasaun husi Xina ba Timor-Leste, no mós hanesan doasaun ekipamentu protesaun individual ne’ebé ho kuantidade boot iha momentu ne’e.

“Xina nafatin apoiu Timor-Leste hodi prevene an hosi Covid-19, ami apoiu material anti-epidémiku, luvas ba pesoál saúde sira, máskara, hena ba pesoál sira hatais hodi halo prevensaun ba moras ne’e,” Embaixadór Xina iha Timor-Leste, Xiao Jianguo hateten liuhosi komunikadu imprensa ne’ebé Tatoli asesu, kuarta ne’e.

Nia dehan, Xina ho Timor-Leste hanesan nasaun ne’ebé amigo di’ak tebes. Tanba ne’e tenke tulun-malu iha situasaun difisil sira.

Iha juñu, Xina oferese ona vasina Sinovac ho total dose 100,000. Agora daudaun, Virus Delta halo situasaun epidémika agravadu no Timor-Leste hasoru hela dezafiu foun.

Xina halo doasaun lote ekipamentu anti-epidémika ba Timor-Leste inklui máskara, luvas médiku, roupa protesaun no kapa sapatu. Ida ne’e mak doasaun Ekipamentu Protesaun Individual ho kuantidade bot ne’ebé oferese husi Xina.

Xina ho Timor-Leste hanesan nasaun amigu. Bazeia ba kontextu komunidade mundiál ho saúde ba ema hotu, Xina sei kontinua oferese asisténsia tuir nia abilidade hodi tulun Timor-Leste hasoru epidemia.

Ministra Saúde, Odete Belo hateten, Variante Delta potensiálmente lori fila fali Timor-Leste ba kotuk iha ne’ebé nia komesa luta hasoru epidemia, no fó ameasa ba Timor-Leste no nia emar sira.

Agora sistema médiku iha nesesidade urjente ba Ekipamentu Protesaun Individual no Xina oferese asisténsia ho lalais tebes. Ministériu Saúde hato’o agradese ba Xina ne’ebé sempre hamriik ho Timor-Leste no espera bele koopera liután ho Xina iha area médiku no kuidadu saúde.

Ekipamentu anti-epidémiku ne’ebé ajudu husi Xina iha momentu ne’e mak hanesan; máskara ho totál 240,000, luvas médiku ho total 100,000, roupa protesaun hamutuk 15,000 no kapa sapatu hamutuk 15,000.

Jornalista     : Hotencio Sanchez

Editór            : Francisco Simões

HAKEREK NO HATÁN

Please enter your comment!
Please enter your name here