Diretór Serbisu Saúde Baucau, Domingos Reinaldo da Costa Guterres. Imajen TATOLI/Natalino Belo

BAUCAU, 08 setembru 2021 (TATOLI)—Servisu Saúde Baucau hahú orienta sentru no postu saúde hotu atu koordena ho profesór sira iha eskola atu oferese dadus estudante ho tinan 12 to’o 17 hodi ikus mai bele simu vasina.

“Enkuantu sira ne’ebé la eskola, pesóal saúde sira servisu hamutuk ho líder suku atu kontribui dadus. Tuir planu atu implementa iha fulan-setembru, ne’ebé konforme informasaun Governu sei sosa vasina Pfizer atu utiliza ba labarik ho idade 12 to’o 17,” Diretór Serbisu Saúde Baucau, Domingos Reinaldo da Costa Guterres, informa, iha ninia knaar fatin, Ria-mare, kuarta ne’e.

Antes ne’e, Governu liuhosi reuniaun Konsellu Ministru, aprova projetu deliberasaun ida atu sosa vasina prevensaun COVID-19 ho marka Pfizer ba sidadaun ho idade 18 ba kraik, nune’e orienta ona Ministériu Saúde (MS) hodi hahú halo prosesu akizisaun vasina Pfizer no garante kondisaun no ekipamentu sira ne’ebé presiza ba armazenamentu no transporte.

Nune’e mós, orienta ministériu hotu no instituisaun relevante hanesan Servisu Autónomu Medikamentu no Ekipamentu Saúde (SAMES) atubele esforsu hodi koordena ho parseiru dezenvolvimentu sira hodi hetan vasina ne’e ho sistema korrente malirin.

Dadaun ne’e, Timor-Leste utiliza vasina ho tipu rua, hanesan AstraZeneca no Sinovac, ne’ebé ba sidadaun ho idade 18 ba leten.

Fulan ne’e nia laran, COVAX Facility sei oferese vasina Pfizer doze 100.620 ba Timor-Leste.

Notísia relevante: TL sei simu doasaun vasina Pfizer doze 100.620

Iha sorin seluk, Servisu Saúde Baucau kontinua koordena ho autoridade lokál no líder komunitáriu atu buka tuir komunidade sira ne’ebé seidauk simu vasina atubele simu vasina kompleta.

“Ita kontinua vasina rutina, nafatin ita koordena ho xefe suku no aldeia atu buka tuir komunidade balun ne’ebé seidauk vasina, atu mobiliza no konsentra hamutuk halo kontaktu ba pesóal saúde hodi atende,” nia akresenta.

Nune’e mós, autoridade kompetente sira kontinua divulga informasaun kona-ba importánsia vasina ba imunidade pesoál iha tempu pandemia.

“Ita haree komunidade sira hahú komprende no iha konsiénsia, ne’ebé idaidak hahú mai buka vasina,” Domingos hatutan.

To’o agora, vasina iha Baucau atinje ona 72%, kompostu hosi doze dahuluk 51% no daruak 21%, hosi alvu hamutuk 73.317.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here