Produtu Cesta Bázika iha bote-laran Imajen TATOLI/Antónia Gusmão

DILI, 08 setembru 2021 (TATOLI)—Xefe Suku Caicoli, Postu Administrativu Na’in Feto, Munisípiu Dili, Hipólito Marques Sarmento husu reklamante sira iha suku Caicoli atu kumpre serka sanitária no konfinamentu obrigatóriu, tanba iha tempu badak sei simu cesta bázika.

“Ha’u fiar katak Governu liuhosi empreza fornesedór sira iha tempu badak sei distribui cesta bázika ba reklamante (ita-boot) sira. Maibé, presiza ita-nia kontribuisaun ba prevensaun COVID-19 ne’ebé Governu aplika ona serka sanitária no konfinamentu obrigatóriu,” Xefe Suku Caicoli hateten ba Agência TATOLI, liuhosi telefónika, kuarta ne’e.

Autoridade lokál ne’e simu informasaun hosi autoridade postu administrativu no munisípiu katak reklamante sei simu cesta bázika iha tempu badak, maibé bainhira mak atu realiza ne’e seidauk hatene tanba desizaun hotu-hotu iha ministériu relevante sira.

“Ami hein de’it bainhira mak Governu distribui cesta bázika ba reklamante sira ne’ebé mak seidauk simu. Maibé ha’u fiar katak Governu iha ona planu atu fahe tanba ita daudaun ne’e sei iha konfinamentu obrigatóriu, nune’e hein de’it ba,” nia dehan.

Programa cesta bázika ne’e kompeténsia Governu nian entaun atu fahe ka lae ne’e, Governu mak hatene tanba autoridade lokál nia papél mak rekolla dadus, verifika no entrega ba postu, depois munisípiu no to’o iha Ministériu Administrasaun Estatál (MAE) mak submete tan ba ministériu implementadór.

“Ami la’o tuir de’it saida mak munisipál haruka, la’ós ami mak ba fahe direta. Tanba ne’e, ita hein de’it bainhira mak sasán ne’e to’o mai,” Xefe Suku Caicoli hateten.

Nia informa, reklamante 16 no mós ho abitante 63 hosi Suku Caicoli mak seidauk simu cesta bázika, no abitante 16 ne’e naran laiha mak halo karta reklamasaun maibé abitante 63 ne’e naran iha lista distribuisaun empreza distributór nian maibé ema-ne’e mak la ba simu.

Entretantu, reklamante Alexandre Godinho, informa Governu presiza atende mós ba reklamante sira-ne’ebé seidauk hetan cesta bázika.

“Ami reklamante sira-ne’e seidauk simu to’o agora maibé Governu hakarak aplika hela de’it konfinamentu obrigatóriu depois oinsá ho ami-nia nesesidade bázika sira-ne’e. Governu bainhira aplika regra ruma tanke iha mós preparasaun nia povu sira labele aplika no aplika de’it,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here