Prezidente RAEOA, Arsénio Paixão Bano, lansa vasina Sinovac doze dahuluk iha Pante Makasar. Imajen Tatoli/Abilio Elo Nini.

OÉ-CUSSE, 08 setembru 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa populasaun RAEOA 83% (34.970) simu ona vasina AstraZeneca ho Sinovac doze dahuluk nian.

Notísia Relevante: Populasaun RAEOA 81,2% simu ona vasina AstraZeneca

“Ita-nia populasaun iha Oé-Cusse simu ona vasina AstraZeneca ho Sinovac iha doze dahuluk atinji ona 83% ho totál ema hamutuk 34.970 ne’ebé kobre hosi sub-rejionál Nitibe 86%, Oésilo 90%, Pante Makassar 90% no Passabe 73%,” Arsénio Paixão Bano informa ba Agênsia Tatoli liuhosi telefónika, kuarta ne’e.

Populasaun RAEOA ne’ebé seidauk simu vasina hamutuk 6.672 (16,6%), no dadus kona-ba populasaun sira-ne’ebé simu ona vasina doze daruak ne’e foin mak atinje 17% (6.976).

“Ha’u husu ba Atoni-oan sira-ne’ebé mak seidauk simu vasina doze dahuluk no daruak, atu hakbesik-aan ba fasilidades saúde hanesan postu saúde no sentru saúde sira, nune’e bele hetan vasina AstraZeneca ho Sinovac ho gratuita,” nia apela.

Maske iha 09 setembru ne’e Governo Sentrál liuhosi Reuniaun Konsellu Ministro (KM) deside hakotu Serka Sanitária ba suku Naimeco, sub-rejiaun Pante Makasar no aldeia Saben, suku Bobometo, maibé husu ba Atoni-oan sira iha suku rua ne’e atu koopera ho autoridade hodi bele simu vasina, atu nune’e bele livre halo movimenta iha rai laran.

Aleinde ne’e, nia hateten, iha RAEOA suspende mós atividade ensinu aprendizajen durante fulan ida-resin maibé baihira atu re-ativa hikas aula prezensiál ne’e profesór sira mós presiza simu vasina kompletu antes hala’o fali atividade eskola nian.

“Ita-nia profesór sira iha RAEOA hamutuk 1.113 maibé foin ema 635 mak simu ona vasina doze dahuluk no ema 314 mak simu ona vasina kompletu. Hirak ne’ebé seidauk simu vasina hamutuk 164. Bainhira atu re-ativa fali ensinu aprendizajen, profesór sira tenke vasina, nune’e ita bele halo prevensaun. Husu ba profesór sira hakbesik-aan ba fasilidade saúde sira hodi simu vasina,”  nia haktuir

Entretantu, tuir trajetu kobertura vasinasaun iha Rejiaun Administrativa Espesiál Oé-Cusse Ambeno (RAEOA) tenke fó vasina ba ema hamutuk 41.442.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here