Benefisiáriu ba idozu no invalidés iha Nitibe simu subsídiu hosi BNCTL. Imajen/Mídia MSSI-RAEOA.

OÉ-CUSSE, 08 setembro 2021 (TATOLI)—Xefe Departamentu Ministériu Solidareidade Sosiál no Inkluzaun (MSSI) RAEOA, Adelino Cau, informa pagamentu ba benefisiáriu idozu no invalidés etapa primeiru tinan 2021 iha Oé-Cusse, kuaze atu konklui ona tanba daudaun ne’e hela suku tolu iha iha sub-rejiaun Pante Makasar mak seidauk simu.

Notísia Relevante: BNCTL RAEOA halo pagamentu direta ba idozu 200 iha Nitibe

“Pagamentu ba idozu-invalidés atu ramata ona. Agora la’o daudaun iha suku tolu de’it, suku Naimeco, Lalisuk ho Taiboko iha Pante Makasar maibé sub-rejiaun Oé-silo, Pasabe no Nitibe finaliza ona iha fulan kotuk. Kuaze iha semana ne’e nia laran, ita sei konklui nun’e ita halo relatóriu no prepara fali ba etapa daruak nian,” Adelino Cau informa ba Agência Tatoli iha Santa Rosa, Oé-Cusse, kuarta ne’e.

Aleinde ne’e, kona-ba pagamentu ba benefisiáriu Bolsa da Mãe nian, finaliza tiha ona iha fulan kotuk ho totál hamutuk 4.512 no daudaun ne’e MSSI Oé-Cusse trata dokumentu ba labarik sira-ne’ebé seidauk iha konta bankaria.

Durante iha prosesu pagamentu ne’e hasoru difikuldade barak mak dalaruma pagamentu la tuir oráriu tanba situasaun pandemia COVID-19, entaun benefisiáriu sira mós lakon tempu hodi hein.

Tuir lolós pagamentu ne’e ramata ona iha fulan kotuk maibé suku balun Governu aplika hela Serka Sanitária, Maske nune’e, ekipa sira halo pagamentu to’o ohin loron hodi kumpre nafatin regra hosi Organizasaun Mundiál Saúde (OMS). 

Xefe Suku Taiboko, Joaquin Tafin, hateten maske benefisiáriu sira iha suku refere simu ikus maibé sira entuziasmu no koopera ho autoridade hodi hein to’o loron 07 setembru mak foin simu sira-nia direitu.

“Benefisiáriu sira komprende hein tanba situasaun COVID-19. Sira hein oráriu foun hosi MSSI mak benefisiáriu ihamutuk 624 ne’e foin simu sira-nia direitu,” nia dehan.

Entretantu totál benefisiáriu ba simu subsídiu idozu no invalidés iha RAEOA ne’e hamutuk 6.471. Sira hirak ne’e maihosi sub-rejiaun Pante Makasar 3.058, sub-rejiaun Oésilo 1.394, sub-rejiaun Passabe 733 no sub-rejiaun Nitibe 1.286.

Notísia Relevante: Benefisiáriu subsídiu ba idozu-invalidés iha RAEOA 6.471

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here