Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, prezide reuniaun Konsellu Ministru, iha auditorium Ministériu Finansa, Aitarak-laran, kuarta (08/09). Imajen TATOLI/Egas Cristóvão

DILI, 08 setembru 2021 (TATOLI)–Governu liuhosi reuniaun Konsellu Ministru (KM) deside hodi mantein imposizaun serka sanitária iha munisípiu Baucau, Ermera, Dili, no Covalima to’o loron 22 setembru 2021.

“Nune’e, bandu nafatin tama no sai hosi munisípiu haat ne’e, exetu tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu halo ba interese públiku,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha auditorium Ministériu Finansa, Aitarak-laran, kuarta ne’e.

Notísia relevante: Serka sanitária iha Baucau-Covalima hahú aban to’o 08 setembru

Tuir Portavóz Governu proibisaun ne’e la abranje ba indivíduu sira ne’ebé komprova ona vasinasaun kompleta ka doze daruak kontra COVID-19 no ba labarik sira tinan 6 mai-kraik ne’ebé akompaña indivíduu sira ne’e.

“Serka sanitária diferente ho konfinamentu obrigatóriu, tanba serka sanitária mak regra ne’ebé kontrola iha munisípiu sira, iha zona administrativa ida ka parsela ida hosi ita-nia territóriu nasionál,” nia esplika.

Iha reuniaun ezekutivu ne’e, deside mós hodi hakotu impozisaun serka sanitária iha área sira ne’ebé abranje suku Naimeko, sub-rejiaun Pante Makassar no suku Bobometo, sub-rejiaun Oésilo, iha Rejiaun Administrativa Espesiál Oé-cuse Ambeno (RAEOA) hahú tuku 23:59 loron 08 setembru 2021.

Enkuantu, impozisaun serka sanitária iha munisípiu Manufahi ne’ebé vigora to’o loron 15 setembru 2021 la iha alterasaun.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here