Na'in Feto Ramelau. Imajen/Espesiál

DILI, 08 setembru 2021 (TATOLI)-Prezidente Ezekutivu Komisaun Nasional Juventude Katólika Timor-Leste (CNJTL-sigla portugés), Pe. João Soares, informa 08 setembru nu’udar selebrasaun solenidade nativity/nativita (loron moris) Nain-Feto nian, tanba konsidera Nain-Feto lori projetu salvasaun Nai Maromak Nian ba umanidade tomak.

“Loron ohin, uma-kreda konsidera solenidade atividade loron moris Nain-Feto nian ne’e selebrasaun boot ida ka privilejiada ba uma-kreda ne’ebé fiar iha Nain-Feto tanba nain feto nu’udar Eva foun tanba rona Anju Saun Gabriel ne’ebé lori mensajen Maromak nian ba nain feto husu nain feto nia prontidaun sai kolaboradora ba projetu salvasaun nai Maromak nian ba umanidade tomak,” Pe. João Soares ba Agência Tatoli liuhosi telefónika, kuarta ne’e.

Nia hatutan, selebra solenidade nativita  Na’in-Feto nian konsidera selebra Eva foun tanba Eva tuan ne’ebé tuir doutrina hateten katak Eva tuan mak lori pekadu tama iha mundu tanba falta koñesimentu, sensibilidade no konsekuénsia hosi ninia aktu tanba rona mensajen diabu (samea) nian ne’ebé provoka lori nia sai hosi ambiente ne’ebé Maromak prepara ba nia tama ambiente demóniu nian.

“Entaun ita selebra loron 08 setembru ida ne’e Nain-Feto pelumenus ninia personalidade ema maibé nu’udar Maromak inan ne’ebé ho ninia obediénsia halo tuir maromak nia vontade, entaun liuhosi selebrasaun ne’e virtude Na’in-Feto nian ne’e bele mós ita ida-idak bele komunga hodi tau iha prátika moris loroloron nian,” nia dehan.

Nia dehan, ligadu ba situasaun agora pandemia COVID-19 iha Timor-Leste lori todan tebes ba povu maibé oinsá mak povu no sarani bele simu hahalok Na’in-Feto nian iha moris loroloron liuliu iha tempu agora pandemia ida ne’e pasiénsia barak.

Tanba hatene katak momentu ida-ne’e hanesan Na’in-Feto rona mensajen Maromak nian ne’ebé hato’o hosi Saun Gabriel katak atu sai Maromak nian, Nia rona sente hanesan iha konfidente obrigatóriu nia-laran, tanba la espera tenke simu novidade ne’e halo nia la livre tanba iha razaun barak, hanesan feto ran seidauk hola Mane maibé tenke halo tuir Maromak nia hakarak.

“Iha situasaun agora ne’e dala barak liu ita sente down tanba ho desizaun hosi ita-nia Governu nian ne’ebé iha momentu balu halo povu sente kontente no triste maibé desizaun saida de’it mak Governu foti tanba hakarak atu salva ita hosi moras COVID-19, nune’e fiar nafatin Maromak hanesan Nain-Feto buat hotu entrega ba Maromak,” Pe. João Soares hateten.

Maske iha situasaun dala-ruma iha misa no dala-ruma mós lae, maibé halo nafatin orasaun iha família husu tulun iha Nai-Feto nune’e liuhosi Nai-Feto hato’o ba Maromak bele hakotu lalais situasaun pandemia COVID-19 iha Timor-Leste.

“Ita tenke reza nafatin katak ita-nia destinu ne’e iha Maromak nia liman la’ós COVID-19 nia liman. COVID ne’e parte ida kontribui moras ba ita maibé la’ós únika atu hakotu ita-nia vida ne’ebé labele ta’uk liu hasoru COVID-19, maibé hotu-hotu koopera ho ita-nia Governu halo tuir regra ne’ebé iha nune’e ita labele moras,” nia dehan.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here