Membro Deputado KHUNTO, António Verdial De Sousa. Imajen/Tatoli Egas Cristovao

DILI, 07 setembru 2021 (TATOLI)–Reprezentante Povu iha uma fukun Parlamentu Nasionál husu Governu liuhosi Ministériu Edukasaun (ME) atu halo aproximasaun ho eskola privadu sira nune’e hamenus pagamentu propinas.

Notísia Relevante: PN husu loke investigasaun ba implementasaun subsídiu propinas

“Ami husu atu Ministériu Edukasaun halo aproximasaun ba eskola privadu sira, buka meiu ka halo akordu hodi hamenus iha pagamentu propinas ka selu eskola,” Vise-Xefe Bankada KHUNTO,  Deputadu António Verdiál de Sousa, informa ba jornalista sira, iha resintu uma fukun, tersa ne’e.

Tanba, tuir nia, durante aplikasaun deklarasaun estadu emerjénsia no introdús medida serka sanitária no konfinamentu obrigatóriu ne’e komunidade barak lakon rendimentu.

Nia dehan, ensinu aprendizajen ne’e importante tebes, tamba nasaun ne’e iha nia oan sira-nia liman.

Desde inísiu kuandu pandemia COVID-19 afeta Timor-Leste, Ministeriu Edukasaun no Ministériu Ensinu Superiór suspende aula prezensiál hodi opta ba aula ensinu distánsia ka eskola ba uma.

Bainhira suspensaun ba aula sira, komisaun G, ne’ebé trata asuntu Edukasaun Juventude, Kultura no Sidadania, tún ba terrenu hodi hala’o fiskalizasaun ba iha eskola sira atu haree no rona diretamente vantajen no dezvantajen hosi aula distánsia ka programa eskola ba uma.

Prezidente Komisaun G ne’e fó-sai katak, bainhira deputadu sira tún ba halo fiskalizasaun iha terrenu só haree no rona dezvantajen hosi aula online ne’e mak hanesan família barak mak laiha kondisaun hodi sosa telefone androide, família barak mak laiha televizaun hodi akompaña aula.

Nune’e mós inan-aman barak mak laiha tempu hodi akompaña sira-nia oan iha aula online, tanba sira presiza ba serbisu atubele sustenta família nia ai-han loron-loron nian.

Komisaun G ne’e haree katak, iha área remota laiha eletrisidade, profesór barak mak la hetan informasaun kona-ba aula online no profesór barak mak la preparadu hodi asesu ba aula online ne’e.

Notísia Relevante: MEJD-RTTL renova kontratu implementasaun programa “eskola ba uma”

PN konsidera programa eskola ba uma la efetivu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here