Sekretáriu Regionál Asuntu Saúde, Manuel da Costa, husu ba funsionáriu foun sira servisu ho dixiplina no responsabilidade. Imajen Tatoli/Abílio Elo Nini.

OÉ-CUSSE, 07 setembro 2021 (TATOLI)—Sekretáriu Rejionál Asuntu Saúde, Manuel da Costa, husu ba pesoál saúde no funsionáriu públiku foun sira ba rejime jerál no espesiál hanesan espesialidade médiku jerál, parteria, enfermeiru, farmasista, atu hala’o servisu ho dixiplina hodi hatudu profisionalidade no servisu ekipa ho responsabilidade.

Notísia Relevante: Menus rekursu umanu, servisu saúde RAEOA rekruta funsionáriu 54

Servisu saúde rejionál destaka nia funsionáriu foun sira hamutuk 47 ba iha postu saúde no sentru saúde sira iha sub-rejionál sira, ne’ebé pasa ona liuhosi prosesu inskrisaun, selesaun dokumentu, ezame eskrita no prova orál hosi totál kandidatu na’in-200-resin no ikus mai na’in-47 mak prenxe kriteria

Funsionáriu foun sira rona orientasaun hosi Sekretáriu Regionál Asuntu Saúde, Manuel da Costa. Imajen Tatoli/Abílio Elo Nini.

“Ha’u husu ba funsionáriu foun sira servisu ho dixiplina no responsabilidade. Hanesan servidór makina Estadu, atu serbí ita-nia populasaun sira-ne’ebé mak namkari iha teritoriu Oé-Cusse ne’e presiza hatudu dixiplina,” Manuél da Costa hateten bainhira fó orientasaun jerál ba funsionáriu foun hamutuk 47 hosi ajente administrasaun públika no profisionál saúde, molok destaka sira iha postu saúde no sentru saúde sira iha sub-rejionál haat, iha salaun Dirasaun Alfandega Palaban, Oé-Cusse, tersa ne’e.

Importante, nia dehan, servisu hamutuk iha fatin servisu ba atendimentu nian no obedese kumpre orientasaun servisu ne’ebé superiór orienta, tanba funsionáriu públiku sira hala’o servisu tuir instrusaun intituisaun Estadu nian.

Administradór Hospitál Referensia Oé-Cusse, Manuel da Cunha, enkoraza funsionáriu foun sira atu fila ba fatin servisu presiza servisu hamutuk ho entidade sira iha suku no aldeia, atu serbí komunidade ho fuan no ho responsabilidade.

Entretantu, funsionariu públiku hamutuk na’in 47 ne’e sei hala’o servisu iha fulan setembru 2021, hodi koloka sira ba iha sentru saude haat (4) no postu saude hamutuk 19, inklui balun koloka iha Hospital Referensia Oé-Cusse

Jornalista : Abílio Elo Nini

Editor       : Cancio Ximenes

HAKEREK NO HATÁN

Please enter your comment!
Please enter your name here