Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 07 setembru 2021 (TATOLI)—Ministru Administrasaun Estatál (MAE), Miguel Perreira de Carvalho, propoin ba Komité Revizaun Orsamentu Polítika (KROP) atu konsidera atividade adisionál balun ne’ebé MAE presiza implementa iha tinan oin.

“Tetu fiskál ne’e konserteja la natón ba ministériu ne’e hodi hala’o atividade prinsipál sira ministériu nian iha tinan oin. Entaun ho ida-ne’e MAE propoin ba Komité Revizaun Orsamentu Polítika atu haree no bele konsidera atividade adisionál balun iha tinan oin,” Miguel Perreira de Carvalho hateten ba jornalista sira, iha Ministériu Finansa (MF), Aitarak-laran, Dili, tersa ne’e.

Governante ne’e hateten, MAE planea atu tinan oin sei kontinua halo uma ba komunidade iha área rurál ne’ebé laiha kbiit atu konstrui sira-nia uma.

“Ita kontinua halo uma ba ita-nia povu sira iha suku 442 no ba tinan ne’e ita halo ona uma tolu ba kada suku sira. Entaun ministériu hanoin katak importante atu halo uma ba povu kbiit laek tanba ita-nia povu mak presiza. Ita presiza konstrui tan uma ba povu kbiit laek hamutuk 1.254, karik KROP konsidera. Ida-ne’e bele halo ita tinan oin,” nia dehan.

MAE propoin atu iha tinan oin ne’e suku hotu-hotu iha territóriu nasionál bele hetan osan adisionál purvolta millaun $25 hodi konstrui uma ba povu sira, no osan adisionál millaun $17 atu aloka ba suku hodi nune’e reforsa ba Programa Nasionál Dezenvolvimentu Suku (PNDS) nian.

Ministériu Administrasaun Estatál (MAE) liuhosi STAE propoin osan hodi realiza ba eleisaun prezidensiál tinan 2022, purvolta millaun $9.3 hodi utiliza ba eleisaun primeira no segunda volta nian.

“Ami propoin tetu fiskál mak hamutuk millaun $44 no adisionál purvolta milliaun $44 ho STAE nian entaun hamutuk millaun $53. Tanba STAE sei halo atividade prinsipál ba eleisaun prezidensiál 2022 nian. Tanba ne’e, ohin ha’u hato’o ba KROP atu konsidera para STAE bele realiza eleisaun prezidensiál iha tinan oin iha rai-laran no rai-li’ur ho di’ak,” nia rekomenda.

MAE aprezenta proposta orsamentu servisu sentrál Ministériu Administrasaun Estatál nian no la inklui munisípiu 12 ne’e, orsamentu MAE ho Sekretáriu Tékniku Administrasaun Eleitorál (STAE) no Arkivu Nasionál nian, orsamentu tetu fiskál hamutuk millaun $45.

Bazea ba tetu fiskál ida-ne’e, MAE sei organiza ba servisu prinsipál tolu mak programa desentralizasaun administrativa no podér lokál, eleisaun prezidensiál ba tinan 2022 no prezervasaun dokumentu istóriku nasaun nian liuhosi Dirasaun Nasionál Arkivu Nasionál nian no programa seluk tan ne’ebé mak MAE planea ona.

Kona-ba Ataúro, nia dehan, MAE propoin ba KROP ba administrasun nian de’it mak purvolta millaun $2.5 atu estabelese lixeira no mós servisu sira seluk ne’ebé bazea ba dekretu lei 3/2016.

MAE iha hanoin atu kria fundu espesiál dezenvolvimentu ida ba Munisípiu Ataúro, nune’e bele implementa infraestrutura iha ne’ebá tanba hahú iha 01 janeiru 2022, illa Ataúro funsiona hanesan Munisípiu Ataúro.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here