Diretora PNDS Baucau, Amélia Maria Viegas. Imajen TATOLI/Natalino Belo

BAUCAU, 07 setembru 2021 (TATOLI)–Diretora Programa Nasionál Dezenvolvementu Suku (PNDS)  Baucau, Amélia Maria Viegas, hateten, kondisaun klima difikulta ekipa implementa projetu Uma Kbiit Laek (UKL) iha postu Laga no Baguia.

“Ita-nia progresu implementasaun projetu Uma Kbiit Laek iha Baucau atinje ona 24% hosi uma 114, ne’ebé implementasaun ne’e iha postu haat, maibé suku barak iha postu Laga no Baguia mak seidauk realiza tanba kondisaun udan durante ne’e,” Diretora PNDS informa ba Agência TATOLI, iha ninia knaar fatin, Villa nova, tersa ne’e.

Tuir Amélia, kondisaun ne’e difikulta mobiliza materiál ba aldeia Asanunu , suku Soba no seluk tan iha Baguia.

PNDS rasik koordena ona ho Admistrasaun munisipál atu husu apoia ba Institutu Jestaun Ekipamentu (IGE, sigla portugés) iha nasionál atu fasilita loke dalan ba suku sira ne’ebé susar asesu estrada, nune’e bele fasilita mobiliza transporte ba fatin projetu.

Notísia relevante: Suku 59 iha Baucau hahú konstrusaun Uma Kbiit Laek

Maski nune’e, PNDS Baucau nafatin aselera prosesu, hanesan atu konklui faze aprovizionamentu, nune’e bele hahú etapa movimentasaun materiál ba fatin projetu sira.

“Kuaze iha suku 15 mak seidauk implementa inklui suku  Afasa iha Quelicai sei iha prosesu aprovizionamentu, seluk iha laga no Baguia,” Amélia akresenta.

Daudaun ne’e maioria projetu UKL to’o ona faze sinta jerál, monta besi letan atu taka kalen.

Postu ne’ebé progresu a’as ona mak postu Venilale, Vemase, Baucau Villa no Quelicai.

Tuir kalendáriu, PNDS Baucau nia alvu iha fulan-setembru nia rohan sei finaliza, maibé tanba klima no implentasaun konfinamentu domisiliáriu iha Dili mak fó mos impaktu tanba kuaze fornesedór hotu foti materiál fábrika iha Dili.

“Situasaun atuál fó impaktu ba progresu inplementasaun UKL tanba fornesedór labele halo movimentu,” Amélia hatutan.

Orsamentu ba programa ne’e iha tinan 2021 hamutuk millaun $3,2, ho totál benefisiáriu hamutuk 177 iha suku 59 iha Baucau, ne’ebé kada aldeia ida sei konstrui uma tolu.

Suku ida hetan alokasaun osan $54.000, ne’ebé fahe ba kustu operasionál $3.000 no kustu infraestrutura $51.000 tuir tipu uma.

Uma Kbiit Laek rasik bazeia ba kritéria no iha tipu rua hanesan medida 48m² ho kustu $17.000 no 37 m² ho kustu entre $14.000 to’o $16.000.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here