Ekipa KOICA hasoru malu ho SEJD hodi diskute kona-ba KOICA nia programa hakarak dezenvolve desportu iha TL. Imajen/Espesiál

DILI, 07 setembru 2021 (TATOLI) – Field manager KOICA nian iha Timor-Leste,  Minyoung Lee, hateten KOICA iha kompromisu boot dezenvolve desportu iha Timor-Leste liu-liu futeból ba labarik sira no harii infraestrutura desportu.

“Programa sira-ne’e iha hotu ona, hein de’it implementa iha tinan oin. Ami hakarak fó oportunidade ba labarik sira hodi dezenvolve sira-nia talentu. Ami nia projetu ne’e prioridade liu lima; fó formasaun desportu futeból ba foin-sa’e sira, fó edukasaun ba treinadór futeból ba labarik sira, hasae konsiénsia labarik sira-nian iha desportu, harii fasilidade desportu nian, ikus liu sei halo peskiza ba labarik sira nia progresu bainhira tuir ami nia programa ne’e”, Lee informa ba Agência Tatoli iha nia rezidénsia Lecidere, Dili, tersa ne’e.

Projetu ne’e KOICA sei realize tanba koordenasaun di’ak entre governu Korea Súl no Governu Timor-Leste liu-liu Ministériu Edukasaun Juventude no Desportu (MEJD) no Sekretáriu Estadu Juventude no Desportu (SEJD).

KOICA iha ona hanoin ko’alia ho Governu Timor-Leste hodi harii kampu futeból ho medida ki’ik tolu iha kapitál Dili hanesan kampu ida iha Kampung Alor, ida iha Bidau Santana no ida tan iha Comoro.

KOICA mós ko’alia ona ho SEJD atu harii sentru desportu iha kampu Culau, Becora, Dili.

Programa KOICA nian ne’e  implementa 2022 bainhira fasilidade sira konstroi remata ona. Projetu ne’e hahú 2021-2025 no iha posibilidade bele extende tan ba oin.

Ba programa no konstrusaun ba kampu sira iha Dili laran KOICA sei gasta osan hamutuk milaun $6,5.

Jornalista         : Hortencio Sanchez

Editór                : Francisco Simões

HAKEREK NO HATÁN

Please enter your comment!
Please enter your name here