Diretora PNDS Baucau, Amélia Maria Viegas. Imajen TATOLI/Natalino Belo

BAUCAU, 07 setembru 2021 (TATOLI)–Diretora Programa Nasionál Dezenvolvimentu Suku (PNDS) Baucau, Amélia Maria Viegas, hateten, funsionáriu foun hamutuk na’in-16 daudaun ne’e reforsa tan serbisu iha Baucau.

“Funsionáriu sira destaka iha loron 01 agostu tuir kada postu neen iha Baucau, kompostu hosi funsionáriu sosiál, finansiál no tékniku ne’ebé oras ne’e daudaun sira hala’o hela serbisu iha postu sira,” Diretora PNDS Baucau informa ba Agência TATOLI, iha ninia knaar fatin, Villa nova, tersa ne’e.

Maski foun, maibé sira nafatin aprende no kolabora ho funsionáriu seluk atubele tau matan ba projetu iha suku.

Funsionáriu hirak ne’e bazeia ba kontratu sei serbisu durante fulan-neen no posibilidade sei extende hosi parte rekursu umanu iha PNDS nasionál.

Tuir Diretora, prezensa funsionáriu sira bele ajuda serbisu tanba PNDS Baucau iha programa regular, reabilitasaun sede suku no Uma Kbiit Laek (UKL) ne’ebé implementa iha tinan ne’e.

“Uluk funsionáriu ne’ebé iha hala’o serbisu ho volume a’as sente susar oituan, maibé bainhira funsionáriu foun mai, ita espera bele di’ak liután iha futuru,” Amélia akresenta.

Antes ne’e, Ministériu Admistrasaun Estatál (MAE) liuhosi diresaun rekursu umanu halo rekrutamentu no teste ba kandidatu 21 PNDS Baucau no tuir formasaun durante loron-neen, maibé ikus mai na’in 16 mak asina kontratu.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here