Prezidente Konsellu veteranu. Vidal de Jesus "Riak Leman". Imajen Tatoli/Francisco Sony.

DILI, 07 setembru 2021 (TATOLI)—Prezidente Konsellu Veteranu, Vidal de Jesus ‘Riak Leman’, hateten ekipa masionál halo verifikasaun dadus veteranu sira-ne’ebé rejistadu iha 2009 iha territóriu nasionál ne’e la’o di’ak no verifika ho rigorozu.

Notísia Relevante:  Ekipa Nasionál halo verifikasaun ba dadus veteranu rejistadu iha 2009

Reak Leman informa prosesu verifikasaun dadus veteranu ne’ebé mak rejista iha tinan 2009 la’o neneik uitoan tanba ekipa verifikadór verifika ho rigorozu ba veteranu rejistadu nune’e mós ho pandemia globál COVID-19 halo ekipa verifikasun labele finaliza lalais.

“Verifikasaun ho rigor naibé la’o lentu tanba veteranu barak. Verifikasaun la’o hela no no ekipa kontinua kumpre nafatin regra prevensaun COVID-19 ne’ebé mak Governu estabelese,” Riak Leman hateten ba Agência TATOLI, iha nia knaar fatin, Vila verde, Dili, tersa ne’e.

Ekipa verifikadór iha munsípiu hotu-hotu la’o normal, ezetu iha munisípiu hirak ne’ebé aplika konfinamentu domisiliariu jerál labele la’o, nune’e komisaun koordena ho polísia hodi limita veteranu sira labele halibur ema barak.

Prezidente Konsellu Veteranu ne’e husu nafatin ba veteranu rejistadu 2009 atu fó-informasaun loloos relasiona ho partisipasaun luta tuir lia-loos no labele falsifika dadus, tanba bainhira komisaun deteta mak sei simu nia konsekuénsia.

“Ami mós forma ekipa monitorizasaun tolu mak ha’u-nia ekipa mak kobre iha munisípiu Aileu, Ainaro, Suai ho Same. Ekipa daruak Vise Prezidente Konsellu Veteranu, Marito Reis mak lidera no kobre iha Liquiça, Ermera, Bobonaro no Rejiaun Administrativa Espesiál Oé-cuse Ambeno (RAEOA) inklui Dili. Ekipa seluk mak Brigadeiru Aluc mak toma konta ba Munisípiu Baucau, Manatuto, Lautem no Viqueque,” nia dehan.

Tuir dadus ne’ebé relata husi Ministériu Asuntu Kombatente Libertasaun Nasionál, dadus rejistadu veteranu 2009 hamutuk 100.000-resin no hosi dadus ne’e, ekipa verifikadór sira verifika 14.000-resin.

Entretantu, verifikasaun ba dadus veteranu sira ne’e, antes ne’e paradu no kontinua hikas fali iha loron 03 agostu 2021 ba territóriu Timor-Leste.

Notísia Relevante: MAKLN prepara ekipa re-verifika dadus veteranu rejistadu iha 2009 

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here